డాక్టర్ కణితి విశ్వనాథం విగ్రహ ఏర్పాటుకు స్థలం కేటాయించండి

పలాస, సూర్య : పలాస-కాశీబుగ్గ మున్సిపాలిటీ అభివృద్ధికి విశేష కృషి చేసిన దివంగత నేత, మాజీ పార్లమెంట్ సభ్యులు డాక్టర్ కణితి విశ్వనాథం కాంస్య విగ్రహాన్ని కాశీబుగ్గ మూడు రోడ్ల కూడలిలో ఏర్పాటుకు స్థలం కేటాయించాలని కోరుతూ శనివారం స్థానిక బీజేపీ నేతలు మున్సిపల్ కమిషనర్ శ్రీనివాసులుకు బీజేపీ జిల్లా ఉపాధ్యక్షులు, సేవా సంకల్ప అభియాన్ కో-కన్వీనర్ పాలవలస వైకుంఠరావు, పూర్వ పలాస నియోజకవర్గ కన్వీనర్ రామానంద స్వామి ఈ వినతిపత్రం అందజేశారు. ఈ సందర్భంగా వారు మాట్లాడుతూ డాక్టర్ కణితి విశ్వనాథం పలాస-కాశీబుగ్గకు ఆర్టీసీ కాంప్లెక్స్, 33 కేవీ సబ్ స్టేషన్, రైల్వే స్టేషన్ అభివృద్ధి, పలు ట్రైన్ల హాల్టింగ్ తీసుకురావడంతో పాటు పలాస జిల్లా పరిషత్ హైస్కూల్ ఆటస్థలం కోసం 3 ఎకరాలు, పేద విద్యార్థుల కోసం సొంత నిధులతో భవనం నిర్మించి మరో 3.50 ఎకరాలు, ఐటీఐ కోసం భూమిని ప్రభుత్వానికి ఉచితంగా ఇచ్చారన్నారు.విద్యార్థుల కోసం రూ.2 కోట్లతో హాస్టల్ నిర్మించి ఎందరో ఎస్సీ, ఎస్టీ, పేద విద్యార్థులను సొంత ఖర్చుతో డాక్టర్లుగా తీర్చిదిద్దారని, లయన్స్ గవర్నర్ గా, వైద్యుడిగా విశ్వనాధం ఉచిత సేవలు అందించారని గుర్తు చేశారు. గోవిందపురం (పుండి)లో 5 ఎకరాలు ఉచితంగా ఇచ్చి జడ్పీ హైస్కూల్ తీసుకురావడం ఆయన ఘనత అన్నారు. ఈ సందర్బంగా మున్సిపల్ కమీషనర్ స్పందిస్తూ.. ఇలాంటి నాయకుడి స్ఫూర్తి నేటి తరానికి అవసరమని, విగ్రహ ఏర్పాటుకు తప్పకుండా స్థలం కేటాయిస్తామని కమిషనర్ హామీ ఇచ్చారని వారు తెలిపారు.

రిపోర్టర్ : విశ్వేశ్వర, పలాస, శ్రీకాకుళం జిల్లా.