చంద్రబాబు పాలనకు ఆకర్షితులై టీడీపీలోకి 20 కుటుంబాలు
కోటబొమ్మాళి, నవంబర్ 17, మేజర్ న్యూస్:
సంతబొమ్మాళి మండలం బావనపాడు గ్రామ పంచాయతీకి చెందిన 20 వైకాపా కుటుంబాలు మంగళవారం తెలుగుదేశం పార్టీలో చేరాయి. నిమ్మాడ క్యాంపు కార్యాలయంలో రాష్ట్ర వ్యవసాయ శాఖ మంత్రి కింజరాపు అచ్చెన్నాయుడు సమక్షంలో వారు వైకాపాను వీడి టీడీపీ తీర్థం పుచ్చుకున్నారు. ఈ సందర్భంగా మంత్రి అచ్చెన్నాయుడు వారికి పార్టీ కండువాలు కప్పి సాదరంగా ఆహ్వానించారు.
రాష్ట్ర అభివృద్ధి కోసం ముఖ్యమంత్రి నారా చంద్రబాబు నాయుడు చేస్తున్న నిరంతర కృషి, ప్రజలకు చేరువవుతున్న సంక్షేమ పథకాలపై ఉన్న విశ్వాసంతోనే తాము టీడీపీలో చేరినట్లు కొత్తగా చేరిన వారు తెలిపారు. అలాగే, టెక్కలి నియోజకవర్గంలోని గ్రామీణ ప్రాంతాల్లో మౌలిక సదుపాయాల కల్పనకు మంత్రి అచ్చెన్నాయుడు చూపుతున్న ప్రత్యేక శ్రద్ధ తమను ఎంతగానో ఆకర్షించిందని వారు పేర్కొన్నారు. ఈ కార్యక్రమంలో పీఏసీఎస్ మాజీ అధ్యక్షుడు కింజరాపు హరి వరప్రసాద్తో పాటు స్థానిక టీడీపీ నాయకులు, కార్యకర్తలు పాల్గొన్నారు. పార్టీలో చేరిన వారిలో ఎస్. ప్రకాష్, వల్లమ్మ, నీలమ్మ, కె. రాజు, బి. ధనరాజు, కృష్ణమూర్తి, ఈశ్వరమ్మ, అప్పలస్వామి తదితరులు ఉన్నారు.