ఎన్సీసీ ఆధ్వర్యంలో మెగా రక్తదాన శిబిరం.. 100 యూనిట్ల రక్తం సేకరణ
ఐతం ఇంజినీరింగ్ కళాశాలలో ఘనంగా రక్తదాన కార్యక్రమం
టెక్కలి మేజర్ న్యూస్:17
ఎన్సీసీ దినోత్సవాన్ని పురస్కరించుకుని 14 ఆంధ్ర ఎన్సీసీ బెటాలియన్, శ్రీకాకుళం ఆధ్వర్యంలో ఐతం ఇంజినీరింగ్ కళాశాలలో స్వచ్ఛంద రక్తదాన శిబిరాన్ని నిర్వహించారు. ఈ శిబిరంలో ఐతం ఇంజినీరింగ్ కళాశాల, మహీంద్రా, ప్రణవి, నరసన్నపేట డిగ్రీ కళాశాలలకు చెందిన ఎన్సీసీ క్యాడెట్లు ఉత్సాహంగా పాల్గొని రక్తదానం చేశారు.
ఈ కార్యక్రమం ద్వారా మొత్తం 100 యూనిట్ల రక్తాన్ని సేకరించి శ్రీకాకుళం రిమ్స్ ఆసుపత్రి, టెక్కలి జిల్లా ఆసుపత్రికి అందజేశారు. దేశ రక్షణలోనే కాకుండా సామాజిక సేవా కార్యక్రమాల్లోనూ తాము ముందుంటామని ఎన్సీసీ క్యాడెట్లు చాటిచెప్పారు.
14 ఆంధ్ర ఎన్సీసీ బెటాలియన్ రెండవ కమాండింగ్ ఆఫీసర్ లెఫ్టినెంట్ కల్నల్ ప్రదీప్ కుమార్ మీనా, సుబేదార్ మేజర్ ఆర్డినరీ లెఫ్టినెంట్ బల్వంత్ సింగ్ పర్యవేక్షణలో ఈ శిబిరం నిర్వహించారు. రక్తదానం ప్రాణదానంతో సమానమని, అత్యవసర సమయాల్లో రక్తం అందక ఎంతోమంది ఇబ్బందులు ఎదుర్కొంటున్నారని, యువత స్వచ్ఛందంగా రక్తదానానికి ముందుకు రావడం అభినందనీయమని నిర్వాహకులు పేర్కొన్నారు.
ఈ సందర్భంగా కళాశాల డైరెక్టర్ ప్రొఫెసర్ వి.వి. నాగేశ్వరరావు, ప్రిన్సిపాల్ డాక్టర్ ఎ.ఎస్. శ్రీనివాసరావు మాట్లాడుతూ విద్యార్థుల్లో క్రమశిక్షణతో పాటు సమాజానికి ఉపయోగపడే సేవా కార్యక్రమాల పట్ల ఆసక్తి పెరగడం సంతోషకరమన్నారు. రక్తదాతలకు ప్రశంసాపత్రాలు అందజేసి వారి సేవాభావాన్ని అభినందించారు.
ఈ కార్యక్రమంలో వైద్యురాలు బి. సునీత, డాక్టర్ డి. విష్ణుమూర్తి, డీన్లు, విభాగాధిపతులు, ఎస్టేట్ మేనేజర్ పిరియా రమేష్ కుమార్, ఎన్సీసీ సిబ్బంది లెఫ్టినెంట్ టి. మురళీమోహన్, శిక్షకులు భుజంగరావు, రమణయ్య తదితరులు పాల్గొన్నారు. రక్తదానానికి ముందుకు వచ్చిన క్యాడెట్లు, విద్యార్థులను కళాశాల యాజమాన్యం, ఎన్సీసీ అధికారులు ప్రత్యేకంగా అభినందించారు.