చిన్నారుల్లో న్యుమోనియా నిర్మూలనకు ప్రచారం - నవంబర్ 12 నుంచి ఫిబ్రవరి 28 వరకు

చిత్తూరు అర్బన్, మేజర్ న్యూస్:చిన్నపిల్లల్లో న్యుమోనియా వ్యాధి భారాన్ని తగ్గించే లక్ష్యంతో కేంద్ర ఆరోగ్య మరియు కుటుంబ సంక్షేమ మంత్రిత్వ శాఖ ప్రారంభించిన న్యుమోనియా వ్యతిరేక ప్రచార కార్యక్రమం 2026 నవంబర్ 12వ తేదీ నుండి 2027 ఫిబ్రవరి 28వ తేదీ వరకు నిర్వహించనున్నట్లు జిల్లా వైద్య మరియు ఆరోగ్య శాఖాధికారి కార్యాలయం తెలిపింది. ప్రపంచ న్యుమోనియా దినోత్సవం సందర్భంగా నిర్వహిస్తున్న ఈ కార్యక్రమం ముఖ్య ఉద్దేశం చిన్నపిల్లల్లో న్యుమోనియా వ్యాధి నివారణ, రక్షణ మరియు చికిత్సపై ప్రజల్లో అవగాహన కల్పించడం, వ్యాధి లక్షణాలను ప్రారంభ దశలోనే గుర్తించడం, తల్లిదండ్రులు మరియు సంరక్షకులలో సకాలంలో వైద్య సేవలు పొందే అలవాటును పెంపొందించడం మరియు న్యుమోనియా నివారణ టీకా ప్రాముఖ్యతను తెలియజేయడం.
ఈ కార్యక్రమంలో భాగంగా అన్ని వార్డు, గ్రామ సచివాలయాలు, ప్రాథమిక ఆరోగ్య కేంద్రాలు మరియు సామాజిక ఆరోగ్య కేంద్రాలలో ప్రచార సామగ్రిని ప్రదర్శించాలి. చిన్నపిల్లల్లో న్యుమోనియా వ్యాధి లక్షణాలు, సంకేతాలు మరియు ప్రమాద సూచనలపై తల్లులు మరియు ప్రజలకు అవగాహన కల్పించాలి. అర్హత కలిగిన పిల్లలకు నిర్ణీత వయస్సు ప్రకారం, తగిన మోతాదులో న్యుమోనియా నివారణ టీకాలు అందేలా చర్యలు తీసుకోవాలి. న్యుమోనియా అనుమానిత కేసులను గుర్తించి, నిర్దేశించిన చికిత్సా మార్గదర్శకాల ప్రకారం తగిన వైద్య చికిత్స అందేలా చూడాలి. అన్ని ఉప ఆరోగ్య కేంద్రాలు, గ్రామ మరియు వార్డు సచివాలయాల పరిధిలో జెంటామైసిన్ ఇంజక్షన్ మరియు అమోక్సిసిలిన్ సిరప్ మందులు అందుబాటులో ఉండేలా చర్యలు తీసుకోవాలని అధికారులు సూచించారు. సంబంధిత అధికారులు మరియు వైద్య ఆరోగ్య సిబ్బంది ఈ సూచనలను తప్పనిసరిగా పాటిస్తూ న్యుమోనియా వ్యతిరేక ప్రచార కార్యక్రమాన్ని విజయవంతంగా నిర్వహించాలని జిల్లా వైద్య మరియు ఆరోగ్య శాఖాధికారి కోరారు.

చిత్తూరు అర్బన్ రిపోర్టర్,   లవకుమార్