బిజెపి ప్రెస్ మీట్

"సర్" ప్రక్రియపై రాహుల్ గాంధీ ఆరోపణలు సరికావు
-జల్లి మధుసూదన్ 
తిరుపతి సిటీ, ఇమేజ్ న్యూస్
ఓటర్ల జాబితా సవరణకు సంబంధించిన ప్రత్యేక సమగ్ర సవరణ ప్రక్రియ (ఎస్ఐఆర్)పై కాంగ్రెస్ అగ్రనేత రాహుల్ గాంధీ చేస్తున్న ఆరోపణలు ప్రజల్లో అనుమానాలు, గందరగోళానికి దారితీస్తున్నాయని బిజెపి రాష్ట్ర అధికార ప్రతినిధి జల్లి మధుసూదన్ అన్నారు. మంగళవారం స్థానిక ప్రెస్ క్లబ్ లో జరిగిన మీడియా సమావేశ ంలో ఆయన బిజెపి నాయకులతో కలిసి మాట్లాడారు. ఎన్నికల వ్యవస్థ, రాజ్యాంగబద్ధ సంస్థలపై ఆరోపణలు చేసేటప్పుడు ఆధారాలతో, చట్టబద్ధంగా వ్యవహరించా లని ప్రతిపక్ష నేత రాహుల్ గాంధీకి సూచించారు.
"ఎస్ఐఆర్" అనేది కొత్తగా తీసుకొచ్చిన ప్రక్రియ కాదని పేర్కొన్నారు. ఓటర్ల జాబితాలో డబుల్ ఎంట్రీలు, మరణించిన లేదా ఇతర ప్రాంతాలకు మారిన ఓటర్లు, తప్పులు, చిరునామాలు, కుటుంబ సభ్యుల వివరాల్లో మార్పులు వంటి అంశాలను పరిశీలించి జాబితాను సవరించేందుకు ఎన్నికల సంఘం చేపట్టే ప్రక్రియలో ఇది భాగమని తెలిపారు. ఎన్నికల సంఘం అధికారిక వివరాల ప్రకారం, 2026లో ఎస్ఐఆర్ ప్రక్రియను పలు రాష్ట్రాలు, కేంద్ర పాలిత ప్రాంతాల్లో చేపట్టింది. దీని 8ప్రధాన ఉద్దేశం అర్హులైన పౌరులు ఓటర్ల జాబితాలో ఉండేలా చూడటం, అనర్హులు చేర్చబడకుండా చూడటమే అన్నారు.
ఎస్ఐఆర్ ప్రక్రియలో ఓటర్ల నమోదుకు, తొలగింపుకు, వివరాల సవరణకు నిర్దిష్ట విధానాలు ఉన్నాయని  తెలిపారు. ఓటర్లకు తమ వివరాలను పరిశీలించుకునే అవకాశం, అవసరమైన సందర్భాల్లో పత్రాలు సమర్పించే అవకాశం ఉంటుందని పేర్కొన్నారు. ఎన్నికల సంఘం అధికారిక ఓటర్ సేవల పోర్టల్‌లో ఎస్ఐఆర్-2026కు సంబంధించిన వివరాలు, పేర్లను పరిశీలించడం, నోటీసులకు పత్రాలు సమర్పించడం వంటి సేవలు అందుబాటులో ఉన్నాయన్నారు.
ఎన్నికల సంఘం ఒక స్వతంత్ర రాజ్యాంగబద్ధ సంస్థ అని, దేశంలో లోక్‌సభ, రాజ్యసభ, రాష్ట్ర శాసనసభలు, రాష్ట్రపతి, ఉపరాష్ట్రపతి ఎన్నికల నిర్వహణలో కీలక బాధ్యతలు నిర్వహిస్తుందని నాయకులు పేర్కొన్నారు.
ఎస్ఐఆర్ పై అనుమానాలు ఉంటే ఎన్నికల సంఘాన్ని ప్రశ్నించడంతో పాటు చట్టబద్ధ మార్గాల్లో ఆధారాలు సమర్పించాలని బీజేపీ నాయకులు సూచించారు. ఎన్నికల వ్యవస్థపై ఆరోపణలు చేయడం ప్రజాస్వామ్యంలో భాగమే అయినప్పటికీ, ఆధారాలు లేకుండా వ్యవస్థపై అనుమానాలు కలిగించే వ్యాఖ్యలు చేయడం సరికాదని అన్నారు.
ఓటర్ల జాబితా సవరణ ప్రక్రియ మతం లేదా రాజకీయ పార్టీ ఆధారంగా కాకుండా అర్హత, పౌరసత్వం, ఓటరు నమోదు నిబంధనల ప్రకారం జరగాలని వారు పేర్కొన్నారు. అర్హత ఉన్న ఏ వ్యక్తి పేరు ఓటర్ల జాబితాలో లేకపోయినా, లేదా వివరాల్లో తప్పులు ఉన్నా, ఎన్నికల సంఘం నిర్దేశించిన విధానంలో వాటిని సరిచేసుకునే అవకాశం ఉందని వివరించారు. ఎన్నికల సంఘం కూడా అర్హులైన ఓటర్లు మినహాయించబడకుండా, అనర్హులు చేర్చబడకుండా చూడటమే ఎస్ఐఆర్ లక్ష్యమని స్పష్టం చేశారు.
గతంలో ఈవీఎంలు, రక్షణ రంగానికి సంబంధించిన అంశాలపై కాంగ్రెస్ నేతలు చేసిన ఆరోపణలను ప్రస్తావిస్తూ రాహుల్ గాంధీపై విమర్శలు చేశారు.అయితే ఎన్నికల వ్యవస్థపై ఏవైనా అభ్యంతరాలు ఉంటే వాటిని సరైన ఆధారాలతో సంబంధిత అధికారుల దృష్టికి తీసుకెళ్లాలని సూచించారు.
ఎన్నికల ప్రక్రియపై ప్రజల్లో విశ్వాసం కొనసాగేందుకు రాజకీయ పార్టీలు, నాయకులు రాజ్యాంగబద్ధ సంస్థలతో చట్టబద్ధంగా వ్యవహరించాల్సిన అవసరం ఉందని బీజేపీ నాయకులు పేర్కొన్నారు. ఎన్నికల సంఘం తీసుకునే నిర్ణయాలపై అభ్యంతరాలు ఉంటే న్యాయపరమైన మార్గాలను అనుసరించాలని కోరారు.

SIR ప్రక్రియపై ప్రజలకు వాస్తవాలను వివరించడమే తమ మీడియా సమావేశం ఉద్దేశమని బీజేపీ నాయకులు తెలిపారు. ఎన్నికల జాబితా సవరణ పూర్తయ్యే వరకు ప్రజలు తమ పేర్లు, వివరాలను పరిశీలించుకుని, అవసరమైన సవరణలు లేదా అభ్యంతరాలను సంబంధిత అధికారులకు సమర్పించాలని సూచించారు.