భక్తుల భద్రతకు ప్రాధాన్యత

ఏపీ స్టేట్ బ్యూరో, సూర్య ప్రధాన ప్రతినిధి

విజయవాడ ఇంద్రకీలాద్రిపై జరుగుతున్న శ్రీ దుర్గా మల్లేశ్వరస్వామివార్ల దేవస్థానం దసరా శరన్నవరాత్రి ఉత్సవాల్లో భక్తుల భద్రతకు పోలీసు శాఖ అత్యంత ప్రాధాన్యమిస్తోంది. లక్షలాది మంది భక్తులు అమ్మవారి దర్శనానికి తరలివచ్చే నేపథ్యంలో రద్దీ నియంత్రణ, ట్రాఫిక్ నిర్వహణ, నిరంతర నిఘా కోసం కృత్రిమ మేధా పరిజ్ఞానంతోపాటు ఆధునిక సాంకేతిక వ్యవస్థలను విస్తృతంగా వినియోగిస్తున్నట్లు రాష్ట్ర పోలీసు డైరెక్టర్ జనరల్ హరీష్ కుమార్ గుప్తా తెలిపారు. బుధవారం కనకదుర్గమ్మను దర్శించుకున్న అనంతరం ఆయన మీడియాతో మాట్లాడుతూ, ఈ ఏడాది దసరా ఉత్సవాల్లో పోలీసు శాఖ కృత్రిమ మేధా పరిజ్ఞానాన్ని మరింత విస్తృతంగా ఉపయోగిస్తోందన్నారు. సంప్రదాయ పోలీసు బందోబస్తుతోపాటు సాంకేతిక నిఘా వ్యవస్థలను సమర్థంగా వినియోగిస్తూ భక్తులకు సురక్షితమైన దర్శనం కల్పించేందుకు చర్యలు చేపట్టినట్లు వివరించారు. ఏఐ ఆధారిత రద్దీ విశ్లేషణ ద్వారా భక్తుల రాకపోకలను అంచనా వేయడం, రద్దీ పెరిగే ప్రాంతాలను ముందుగానే గుర్తించడం, అవసరమైన చోట్ల పోలీసు సిబ్బందిని అప్రమత్తం చేయడం వంటి చర్యలకు ప్రాధాన్యమిస్తున్నట్లు పేర్కొన్నారు. దీనివల్ల రద్దీని సమర్థంగా నియంత్రించడంతోపాటు అత్యవసర పరిస్థితుల్లో వేగంగా స్పందించేందుకు అవకాశం ఉంటుందని తెలిపారు. ఇంద్రకీలాద్రి కొండపై, ఘాట్‌రోడ్డు, క్యూలైన్లు, పార్కింగ్ ప్రాంతాలు, భక్తుల రాకపోకలు అధికంగా ఉండే ప్రదేశాల్లో సీసీ కెమెరాలు, డ్రోన్ల ద్వారా నిరంతర పర్యవేక్షణ చేపడుతున్నారు. డ్రోన్ల ద్వారా అందే దృశ్యాలను కేంద్రీకృత పర్యవేక్షణ వ్యవస్థకు అనుసంధానించి పరిస్థితులను ఎప్పటికప్పుడు సమీక్షించేలా ఏర్పాట్లు చేశారు. ఎక్కడైనా రద్దీ పెరిగినా, భక్తులకు ఇబ్బందులు ఎదురైనా సంబంధిత అధికారులు వెంటనే స్పందించేలా చర్యలు తీసుకుంటున్నారు.

వాహనాల నియంత్రణకు ఆధునిక సాంకేతికత

దేవస్థానం పరిసరాల్లో వాహనాల రాకపోకలను క్రమబద్ధీకరించేందుకు వాహన నంబరు పలకలను స్వయంచాలకంగా గుర్తించే కెమెరాలు, బూమ్ బ్యారియర్లను వినియోగిస్తున్నారు. అనుమతి ఉన్న వాహనాల ప్రవేశాన్ని నియంత్రించడం, అనవసరమైన వాహన రద్దీని తగ్గించడం, భక్తుల రాకపోకలకు ఆటంకాలు కలగకుండా చూడటం ఈ ఏర్పాట్ల ప్రధాన ఉద్దేశమని అధికారులు పేర్కొన్నారు.పోలీసు కమాండ్ కంట్రోల్ కేంద్రం ద్వారా వివిధ ప్రాంతాల్లోని పరిస్థితులను సమన్వయంతో పర్యవేక్షిస్తున్నారు. రద్దీ నియంత్రణ, అవసరమైన చోట్ల ట్రాఫిక్ మళ్లింపు, అత్యవసర పరిస్థితుల్లో తక్షణ స్పందన వంటి అంశాల్లో సాంకేతిక సమాచారాన్ని ఉపయోగించుకుంటున్నారు. క్షేత్రస్థాయిలో పనిచేస్తున్న పోలీసు సిబ్బందితో సమన్వయం చేసుకుంటూ అవసరమైన చర్యలు చేపడుతున్నారు.

భక్తులు పోలీసులకు సహకరించాలి

అమ్మవారి దర్శనానికి వచ్చే భక్తులు పోలీసుల సూచనలను తప్పనిసరిగా పాటించాలని అధికారులు కోరుతున్నారు. క్యూలైన్లలో క్రమశిక్షణతో ముందుకు సాగాలని, అనుమతి లేని మార్గాల్లోకి వెళ్లరాదని సూచించారు. పిల్లలు, వృద్ధులు, ఇతరుల సహాయం అవసరమైన భక్తుల విషయంలో ప్రత్యేక అప్రమత్తత పాటించాలని, ఏదైనా సమస్య ఎదురైతే సమీపంలోని పోలీసు సిబ్బందికి తెలియజేయాలని విజ్ఞప్తి చేశారు.దసరా ఉత్సవాల్లో కృత్రిమ మేధా పరిజ్ఞానంతోపాటు మానవ పర్యవేక్షణ, క్షేత్రస్థాయి పోలీసు బందోబస్తు, వివిధ ప్రభుత్వ శాఖల మధ్య సమన్వయం కీలకమని అధికారులు భావిస్తున్నారు. ఆధునిక సాంకేతిక పరిజ్ఞానాన్ని సమర్థంగా వినియోగిస్తూ భక్తులకు సురక్షితమైన, సౌకర్యవంతమైన అమ్మవారి దర్శనం కల్పించడమే పోలీసు శాఖ ప్రధాన లక్ష్యమని డీజీపీ స్పష్టం చేశారు.ఈ కార్యక్రమంలో దేవస్థానం కార్యనిర్వహణాధికారి శీనా నాయక్, నగర పోలీసు కమిషనర్ రాజశేఖరబాబు తదితరులు పాల్గొన్నారు.

-ఎం.గణేశ్,  స్టేట్ బ్యూరో ఇన్ ఛార్జి