భగినీ హస్తభోజనం రోజున గాజుల అలంకారంలో దర్శనమివ్వనున్న కనకదుర్గమ్మ

ఇంద్రకీలాద్రి, మేజర్ న్యూస్: కార్తీక శుద్ధ విదియ (భగినీ హస్తభోజనం – భ్రాతృవిదియ) పర్వదినాన్ని పురస్కరించుకుని నవంబర్ 11న ఇంద్రకీలాద్రిపై కొలువుదీరిన శ్రీ కనకదుర్గమ్మవారు విశేష గాజుల అలంకారంలో భక్తులకు దర్శనమివ్వనున్నారు. అమ్మవారికి కుంకుమ, గాజులు అత్యంత ప్రీతిపాత్రమైనవి కావడంతో దేవస్థాన సంప్రదాయం ప్రకారం ఈ అలంకరణను శాస్త్రోక్తంగా నిర్వహించనున్నారు.

అమ్మవారి అలంకరణ నిమిత్తం విజయవాడకు చెందిన గ్రంధి రాము, రాధిక దంపతులు, శ్రీ కనకదుర్గ లలితా పారాయణ బృందం తరఫున 446 తోడాల గాజులను దేవస్థాన ఈవో వి.కె. శీనా నాయక్‌కు అందజేశారు. ఈ సందర్భంగా దాతలను ఈవో ప్రత్యేకంగా అభినందించారు. గాజుల అలంకరణ కోసం భక్తులు కూడా తమ వంతుగా గాజులను విరాళంగా సమర్పించవచ్చని తెలిపారు. మరిన్ని వివరాలకు దేవస్థానం టోల్‌ఫ్రీ నంబర్‌ 18004259099ను సంప్రదించాలని సూచించారు.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.