రైతు మేళా, సీఎం సభ ఏర్పాట్లపై ఎస్పీ స్నేహ మెహ్ర క్షేత్రస్థాయి పరిశీలన

దుద్యాల, మేజర్ న్యూస్: వికారాబాద్ జిల్లా కొడంగల్ నియోజకవర్గ పరిధిలోని దుద్యాల మండలం హకీంపేట గ్రామ శివారులో నవంబర్ 7, 8, 9 తేదీల్లో నిర్వహించనున్న రైతు మేళా, ముఖ్యమంత్రి భారీ బహిరంగ సభ ఏర్పాట్లను జిల్లా ఎస్పీ స్నేహ మెహ్ర బుధవారం పోలీసు అధికారులతో కలిసి క్షేత్రస్థాయిలో పరిశీలించారు. ఈ సందర్భంగా బహిరంగ సభ ప్రాంగణం, రైతు మేళా స్టాళ్లు, ట్రాఫిక్ నియంత్రణ పాయింట్లు, వాహనాల పార్కింగ్ స్థలాలను పరిశీలించి భద్రతా ఏర్పాట్లపై అధికారులకు పలు సూచనలు చేశారు. ముఖ్యమంత్రి పర్యటన నేపథ్యంలో ఎలాంటి అవాంఛనీయ సంఘటనలు చోటుచేసుకోకుండా పటిష్టమైన బందోబస్తు ఏర్పాటు చేయాలని, ట్రాఫిక్ నియంత్రణకు ప్రత్యేక ప్రణాళిక సిద్ధం చేయాలని ఆదేశించారు. బందోబస్తు విధుల్లో పాల్గొనే పోలీసు సిబ్బంది క్రమశిక్షణ, అప్రమత్తత, సమయపాలన పాటిస్తూ తమకు కేటాయించిన బాధ్యతలను సమర్థవంతంగా నిర్వహించాలని సూచించారు. అన్ని విభాగాల అధికారులు సమన్వయంతో పనిచేసి రైతు మేళా, ముఖ్యమంత్రి పర్యటన ప్రశాంతంగా, విజయవంతంగా జరిగేలా చర్యలు తీసుకోవాలని స్పష్టం చేశారు. అనంతరం బందోబస్తు, ట్రాఫిక్ నిర్వహణపై పోలీసు అధికారులకు పవర్ పాయింట్ ప్రజెంటేషన్ ద్వారా దిశానిర్దేశం చేశారు. ఈ కార్యక్రమంలో అదనపు ఎస్పీ రాజేష్ మీనా, డీసీఆర్బీ డీఎస్పీ జనయ్య, డీటీసీ డీఎస్పీ శ్రీనివాస్, పరిగి డీఎస్పీ ఎన్. శ్రీనివాస్, తాండూరు డీఎస్పీ నర్సింగ్ యాదయ్య, ఏఆర్ డీఎస్పీ వీరేష్, కొడంగల్ సీఐ చంద్రశేఖర్ రెడ్డి, దుద్యాల ఎస్ఐ శ్రీశైలం, జిల్లా పోలీసు అధికారులు, సీఐలు, ఆర్ఐలు, ఎస్ఐలు, ఆర్ఎస్ఐలు తదితరులు పాల్గొన్నారు.

రిపోర్టర్: రమేష్, దుద్యాల్, వికారాబాద్ జిల్లా.