భగవద్గీత అధ్యయనంతోనే ఉత్తమ విద్యార్థిగా ఎదుగుతారు

 చిన్మయ గీతా పఠన పోటీల బహుమతుల ప్రధానోత్సవంలో వక్తలు
 ఘనంగా పాఠశాల, జిల్లా స్థాయి విజేతలకు బహుమతుల పంపిణీ
విజయనగరం ,మేజర్ న్యూస్: చిన్మయ మిషన్ ఆధ్వర్యంలో నిర్వహించిన 'చిన్మయ గీతా పఠన పోటీలు – 2026' స్కూల్ మరియు జిల్లా స్థాయి విజేతల బహుమతుల ప్రధానోత్సవ కార్యక్రమం ఆదివారం స్థానిక ఆంధ్రా చిల్డ్రన్స్ హాస్పిటల్ ఎదురుగా ఉన్న చిన్మయ మిషన్ సెంటర్‌లో ఘనంగా జరిగింది.
ఈ కార్యక్రమానికి మహారాజా స్వయంప్రతిపత్తి (ఎం.ఆర్) కళాశాల ప్రిన్సిపాల్ ముక్కామల సాంబశివరావు, ఇన్స్పైరో స్కూల్ ప్రిన్సిపాల్ మరియు అకాడమిక్ డైరెక్టర్ మందా రవికుమార్ ముఖ్య అతిథులుగా హాజరై విజేతలకు బహుమతులు అందజేశారు.
ఈ సందర్భంగా ముఖ్య అతిథులు మాట్లాడుతూ — "చిన్మయ మిషన్ సంస్థ క్రమశిక్షణకు, ఆధ్యాత్మిక విలువల పెంపొందింపునకు మారుపేరుగా నిలిచింది. భగవద్గీత పఠనం విద్యార్థులలో ఏకాగ్రత, క్రమశిక్షణ మరియు నైతిక విలువలను పెంపొందిస్తుంది. పోటీలలో గెలుపోటముల కంటే భాగస్వామ్యం వహించడమే ప్రధానమని, ఈ పోటీల్లో పాల్గొన్న విద్యార్థులందరూ విజేతలే" అని కొనియాడారు.
ఈ కార్యక్రమాన్ని చిన్మయ మిషన్ కన్వీనర్ స్వామి విజయానంద సరస్వతి పర్యవేక్షణలో మిషన్ సభ్యులు ఎంతో శ్రద్ధతో నిర్వహించారు. పాఠశాల స్థాయి నుండి జిల్లా స్థాయి వరకు వివిధ విభాగాల్లో ప్రతిభ కనబరిచిన విద్యార్థులకు, చిన్నారులకు ముఖ్య అతిథుల చేతుల మీదుగా బహుమతులు మరియు ప్రశంసా పత్రాలను అందజేశారు.
ఈ కార్యక్రమంలో చిన్మయ మిషన్ సేవకులు లింగరాజు, సంస్థ ప్రతినిధులు, ఉపాధ్యాయులు, పెద్ద సంఖ్యలో విద్యార్థులు మరియు వారి తల్లిదండ్రులు పాల్గొన్నారు.