బాపూజీ, శాస్త్రిజీల ఆదర్శాలు నిత్య స్మరణీయం: మంత్రి నారా లోకేష్

సూర్య అమరావతి బ్యూరో: సత్యాగ్రహమే ఆయుధంగా, అహింసా మార్గంలో పోరాటం సాగించి దేశానికి స్వాతంత్ర్యం సాధించిపెట్టిన జాతిపిత మహాత్మా గాంధీ, ‘జై జవాన్ - జై కిసాన్’ నినాదంతో యావత్ దేశ ప్రజల్లో దేశభక్తిని, స్ఫూర్తిని నింపిన మాజీ ప్రధాని లాల్ బహదూర్ శాస్త్రి జయంతులను పురస్కరించుకుని ఆంధ్రప్రదేశ్ విద్య, ఐటీ శాఖల మంత్రి నారా లోకేష్ ఘనంగా నివాళులర్పించారు. గుంటూరు జిల్లా ఉండవల్లిలోని తన నివాసంలో ఆ మహనీయుల చిత్రపటాలకు పూలమాలలు వేసి అంజలి ఘటించారు.
ఈ సందర్భంగా దేశ స్వాతంత్ర్యం, సార్వభౌమాధికారం, స్వావలంబన కోసం వారు చేసిన నిస్వార్థ త్యాగాలను, అందించిన విశిష్ట సేవలను మంత్రి స్మరించుకున్నారు.
మహనీయుల జయంతిని పురస్కరించుకుని మంత్రి లోకేష్ తన సందేశాన్ని పంచుకున్నారు:
గాంధీజీ అహింసా మార్గం నిత్యనూతనం:సత్యం, అహింసలను ఆయుధాలుగా మలిచి బ్రిటిష్ పాలనను గడగడలాడించిన మహాత్ముని సిద్ధాంతాలు ప్రపంచ శాంతికి మార్గదర్శకాలని పేర్కొన్నారు. పరిశుభ్రత, గ్రామీణ స్వరాజ్యం మరియు సమగ్ర సమాజ నిర్మాణానికి బాపూజీ చూపిన బాటలో ప్రతి ఒక్కరూ పయనించాలని పిలుపునిచ్చారు.
శాస్త్రిజీ నిరాడంబరత ఆదర్శప్రాయం:దేశ సరిహద్దులను కాపాడే వీర జవాన్లకు, దేశానికి అన్నంపెట్టే రైతన్నలకు సమాన గౌరవం కల్పిస్తూ లాల్ బహదూర్ శాస్త్రి ఇచ్చిన ‘జై జవాన్ - జై కిసాన్’ నినాదం నేటికీ నవ తరానికి ప్రేరణగా నిలుస్తోందని కొనియాడారు. ఆయన నిరాడంబరత, నిజాయితీ రాజకీయ రంగానికి విలువైన పాఠాలని వివరించారు.
యువత బాధ్యతాయుతంగా ఎదగాలి:మహనీయుల త్యాగాలను స్మరిస్తూ, వారి ఆశయాలకు అనుగుణంగా విజ్ఞానం, నైతికతతో కూడిన ఆధునిక సమాజ నిర్మాణంలో భాగస్వాములు కావాలని యువతను కోరారు.ఉండవల్లి నివాసంలో జరిగిన ఈ కార్యక్రమంలో పార్టీ నేతలు, అధికారులు పాల్గొని బాపూజీ, శాస్త్రిజీల చిత్రపటాలకు పుష్పాంజలి ఘటించారు.