బాలికల విద్య, సమానత్వం, బాల్య వివాహాల నివారణపై గ్రామ ప్రజలకు అవగాహన

రేపల్లె, మేజర్ న్యూస్; బాలికలను చదివించి వారికి తగిన విలువనివ్వాలనీ  ప్రోగ్రామ్ మేనేజర్ లక్ష్మీ ప్రసన్న కోరారు ఆదివారం అంతర్జాతీయ బాలికా దినోత్సవాన్ని పురస్కరించుకుని చైల్డ్ రైట్స్ అడ్వకసీ ఫౌండేషన్ (క్రాఫ్) ట్రస్ట్ ఆధ్వర్యంలో రేపల్లె మండలంలోని తుమ్మల, పిరట్లంక, పొతుమెరక, నల్లూరుపాలెం, విశ్వేశ్వరం, పెనుమూడి, కారుమూరు గ్రామాల్లో గ్రామ ప్రజలతో అవగాహన కార్యక్రమాలు నిర్వహించారు. ఈ సందర్భంగా లక్ష్మీ ప్సన్న మాట్లాడుతూ అబ్బాయిలతో సమానంగా చూడాలనే సందేశాన్ని ప్రజలకు వివరించారు. బాల్య వివాహాలను అరికట్టడం ప్రతి ఒక్కరి సామాజిక బాధ్యత అని తెలియజేస్తూ బాల్య వివాహాల నివారణకు ప్రతి ఒక్కరూ కృషి చేయాలని గ్రామ ప్రజలతో ప్రతిజ్ఞ చేయించారు. ఈ సందర్భంగా ప్రజల భాగస్వామ్యంతో సంతకాల సేకరణ కార్యక్రమాన్ని కూడా నిర్వహించారు.
అదేవిధంగా, బాలికల విద్య ప్రాముఖ్యతను తెలియజేసేందుకు బాలికలు డాక్టర్, ఉపాధ్యాయురాలు, న్యాయవాది, కలెక్టర్, సాఫ్ట్‌వేర్ ఉద్యోగి తదితర వృత్తులకు సంబంధించిన వేషధారణలతో ప్రదర్శన నిర్వహించారు. ఈ ప్రదర్శన ద్వారా బాలికలు విద్యను అభ్యసిస్తే వివిధ రంగాల్లో ఉన్నత స్థానాలను చేరుకోగలరని, తమ కలలను సాకారం చేసుకోగలరని ప్రజలకు వివరించారు.బాలికలకు విద్యావకాశాలు కల్పించడం, వారి హక్కులను గౌరవించడం, లింగ వివక్షకు తావులేకుండా సమాన అవకాశాలు అందించడం ద్వారా బాలికల భవిష్యత్తుకు బలమైన పునాది వేయవచ్చని ఈ కార్యక్రమాల ద్వారా తెలియజేశారు. బాల్య వివాహాల నిర్మూలనతో పాటు బాలికల అభ్యున్నతికి సమాజంలోని ప్రతి ఒక్కరూ బాధ్యతగా ముందుకు రావాలనీ ట్రస్ట్ ప్రతినిధులు పిలుపునిచ్చారు.బాలికల హక్కుల పరిరక్షణ, విద్య ప్రోత్సాహం, సమానత్వ సాధన లక్ష్యంగా నిర్వహించిన ఈ కార్యక్రమాలు గ్రామ ప్రజల్లో ఆలోచనను రేకెత్తిస్తూ, బాలికల పట్ల సానుకూల దృక్పథాన్ని పెంపొందించేలా సాగాయి.ఈ కార్యక్రమంలో కోఆర్డినేటర్లు రత్న ఆంజెల్, ఝాన్సీ గ్రామస్తులు తదితరులు పాల్గొన్నారు.