అయ్యగార్లపల్లిలో వృద్ధుడు ఉరివేసుకొని ఆత్మహత్య.

శెట్టూరు: ఒంటరితనం, అనారోగ్య సమస్యలతో మానసిక వేదనకు గురైన ఓ వృద్ధుడు వ్యవసాయ పొలంలో మృతి చెందిన ఘటన శెట్టూరు మండలం అయ్యగార్లపల్లి గ్రామ పరిధిలో శనివారం చోటుచేసుకుంది. ధర్మవరం పట్టణానికి చెందిన కాయల ఈరన్న (71), తండ్రి లక్ష్మన్న, గత రెండేళ్లుగా అయ్యగార్లపల్లి గ్రామానికి చెందిన శివశంకర్‌ వ్యవసాయ పొలంలో పనిచేస్తూ అక్కడే నివాసం ఉంటున్నాడు. భార్య సుమారు 12 సంవత్సరాల క్రితమే మృతి చెందడంతో అప్పటి నుంచి ఒంటరిగా జీవనం సాగిస్తున్నాడు. కుటుంబ సభ్యులకు దూరంగా ఉంటూ వ్యవసాయ పనులు చేసుకుంటూ కాలం గడుపుతున్నాడు. వృద్ధాప్యంలో తోడుగా ఉండేవారు లేక ఒంటరి జీవితాన్ని గడుపుతున్న ఈరన్న కొంతకాలంగా అనారోగ్య సమస్యలతో బాధపడుతున్నట్లు పోలీసుల ప్రకటనలో పేర్కొన్నారు. ఆరోగ్యం సహకరించకపోవడం, తన బాగోగులు చూసుకునేందుకు దగ్గరలో ఎవరూ లేకపోవడంతో తీవ్ర మనస్తాపానికి గురైనట్లు తెలిపారు. ఈ నేపథ్యంలో జీవితంపై విరక్తి చెందాడు. ఈ క్రమంలో శనివారం (నవంబర్ 14) ఉదయం సుమారు 7.30 గంటల సమయంలో పొలంలో ఎవరూ లేని సమయంలో అక్కడి రేకుల షెడ్డులో ఉరివేసుకుని మృతి చెందాడు. ఈ ఘటనతో కుటుంబ సభ్యులు తీవ్ర విషాదానికి గురయ్యారు. విషయం తెలుసుకున్న మృతుడి కుమారుడు ప్రభాకర్ పోలీసులకు ఫిర్యాదు చేశాడు. ఆయన ఇచ్చిన ఫిర్యాదు మేరకు శెట్టూరు పోలీసులు కేసు నమోదు చేసి దర్యాప్తు చేపట్టారు. ఘటనకు సంబంధించిన పూర్తి వివరాలను సేకరిస్తున్నట్లు శెట్టూరు పోలీస్‌ స్టేషన్‌ హెడ్ కానిస్టేబుల్ భవానీ ప్రసాద్ వెల్లడించారు.
శెట్టూరు రిపోర్టర్ :- ఖాసీం.