అర్నబ్ తుఫాన్ ప్రభావిత ప్రాంతాల్లో ఎమ్మెల్యే శిరీష పర్యటన.

అల్లుకోల,రెంటికోట గ్రామాల్లో ముంపు ప్రాంతాలు,పంట నష్టం పరిశీలన.

పలాస, అక్టోబర్ 29, మేజర్ న్యూస్.

అర్నబ్ తుఫాన్ కారణంగా ముంపునకు గురైన పలాస మండలం అల్లుకోల,రెంటికోట గ్రామాల్లో పలాస ఎమ్మెల్యే గౌతు శిరీష గురువారం పర్యటించారు.తుఫాన్ ప్రభావంతో నీట మునిగిన పంట పొలాలను, ముంపు ప్రభావిత నివాస ప్రాంతాలను ఆమె ప్రత్యక్షంగా పరిశీలించారు. గ్రామాల్లో నిలిచిన నీరు, పంట పొలాల్లో చేరిన వరద నీరు, ప్రజలు ఎదుర్కొంటున్న ఇబ్బందులపై ఆరా తీశారు.

సహాయక చర్యలకు ఆదేశాలు:

ముంపు ప్రాంతాల్లో నిల్వ ఉన్న నీటిని బయటకు పంపేందుకు చర్యలు చేపట్టాలని, నీటి ప్రవాహానికి అడ్డంకులను తొలగించాలని సంబంధిత అధికారులకు సూచించారు. తాగునీరు, విద్యుత్ సరఫరా, పారిశుద్ధ్య నిర్వహణపై ప్రత్యేక శ్రద్ధ చూపాలని కోరారు.నీట మునిగిన పంటల నష్టాన్ని వ్యవసాయ, రెవెన్యూ శాఖలు క్షేత్రస్థాయిలో అంచనా వేసి సమగ్ర వివరాలు నమోదు చేయాలని, అర్హులైన బాధిత రైతులకు ప్రభుత్వ నిబంధనల ప్రకారం సహాయం అందేలా చర్యలు చేపట్టాలని ఆదేశించారు.ప్రజల భద్రత, రైతుల పంట నష్టం, సాధారణ పరిస్థితుల పునరుద్ధరణకు ప్రాధాన్యం ఇవ్వాలని ఎమ్మెల్యే శిరీష స్పష్టం చేసారు.