అర్హులైన ప్రతి ఓటరు తమ ఓటు హక్కును తప్పనిసరిగా వినియోగించుకోవాలి

కర్నూలు, నవంబర్ 05: ప్రజాస్వామ్య వ్యవస్థలో ఓటు హక్కు అత్యంత విలువైనదని, అర్హత కలిగిన ప్రతి ఒక్కరూ తమ ఓటు హక్కును తప్పనిసరిగా వినియోగించుకోవాలని జిల్లా కలెక్టర్ , జిల్లా ఎన్నికల అధికారి డాక్టర్ ఏ. సిరి ప్రజలకు పిలుపునిచ్చారు.

గురువారం జిల్లాలో నిర్వహిస్తున్న ఎంపీటీసీ, జడ్పీటీసీ ఎన్నికల పోలింగ్ ప్రక్రియను జిల్లా ఎన్నికల అధికారి, కలెక్టర్  క్షేత్రస్థాయిలో ఆకస్మికంగా తనిఖీ చేశారు. ఇందులో భాగంగా కోడుమూరు మండల కేంద్రంలోని జిల్లా పరిషత్ ఉన్నత పాఠశాల, దేవనకొండ మండలం కరివేముల గ్రామంలోని మండల పరిషత్ ఉన్నత పాఠశాల, దేవనకొండ మండల కేంద్రంలోని ఎంఈఓ కార్యాలయ ఆవరణలో ఏర్పాటు చేసిన పోలింగ్ కేంద్రాలు, పత్తికొండ మండలం కనకదిన్నె గ్రామంలోని మండల పరిషత్ పాఠశాల, దూదేకొండ గ్రామంలోని జిల్లా పరిషత్ పాఠశాల, పత్తికొండ మండల కేంద్రంలోని డిగ్రీ కళాశాలలో ఏర్పాటు చేసిన పోలింగ్ కేంద్రాలను సందర్శించి పోలింగ్ నిర్వహణను పరిశీలించారు.

ఈ సందర్భంగా జిల్లా కలెక్టర్ మాట్లాడుతూ... పోలింగ్ కేంద్రాల్లో ఎన్నికల నిర్వహణ తీరును, పోలింగ్ శాతాన్ని, విజిట్ షీట్లను, సంబంధిత రికార్డులను క్షుణ్ణంగా తనిఖీ చేశారు. ఎన్నికల కమిషన్ మార్గదర్శకాలకు అనుగుణంగా పోలింగ్ ప్రక్రియను సజావుగా నిర్వహించాలని అధికారులను ఆదేశించారు. ఓటర్లు ఎలాంటి అసౌకర్యానికి గురికాకుండా ప్రశాంతమైన వాతావరణంలో సులభంగా తమ ఓటు హక్కును వినియోగించుకునేలా అన్ని మౌలిక సదుపాయాలు కల్పించాలని సూచించారు. పోలింగ్ కేంద్రాలకు వచ్చే ప్రతి ఓటరికి అవసరమైన సహకారం అందిస్తూ, ఎలాంటి ఇబ్బందులు తలెత్తకుండా ప్రత్యేక చర్యలు తీసుకోవాలన్నారు. అర్హత కలిగిన ప్రతి ఓటరు తమ ఓటు హక్కును వినియోగించుకోవడం ద్వారా ప్రజాస్వామ్య ఎన్నికల ప్రక్రియలో భాగస్వాములు కావాలని జిల్లా కలెక్టర్ విజ్ఞప్తి చేశారు. పోలింగ్ ముగిసిన వెంటనే బ్యాలెట్ బాక్సులు, ఎన్నికల సామగ్రిని ఎన్నికల నిబంధనల ప్రకారం పటిష్ట పోలీసు భద్రత నడుమ స్ట్రాంగ్ రూమ్‌లకు తరలించి, భద్రపరిచే ప్రక్రియను అత్యంత అప్రమత్తంగా నిర్వహించాలని సంబంధిత అధికారులను ఆదేశించారు.

ఈ తనిఖీల్లో ఆదోని ఆర్డీవో అరుణ దేవి, సంబంధిత ఎన్నికల అధికారులు, తహసీల్దార్లు, ఎంపీడీవోలు తదితరులు పాల్గొన్నారు.