అర్హులైన ప్రతి ఒక్కరికి ఉచిత న్యాయ సహాయం :జడ్జి రూపశ్రీ

కనిగిరి ,మేజర్ న్యూస్ :జాతీయ న్యాయ సేవల దినోత్సవాన్ని సోమవారం కనిగిరి సివిల్ జడ్జి కోర్టు ఆవరణలో మండల న్యాయ సేవాధికార సంస్థ ఆధ్వర్యంలో మండల న్యాయ సేవాధికార సంస్థ చైర్మన్,జడ్జి బి. రూపశ్రీ అధ్యక్షతన ఘనంగా నిర్వహించారు.ఈ సందర్భంగా జడ్జి బి. రూపశ్రీ మాట్లాడుతూ లీగల్ సర్వీసెస్ అథారిటీస్ యాక్ట్ – 1987 దేశవ్యాప్తంగా 1995 నవంబర్ 9వ తేదీ నుంచి అమలులోకి వచ్చిందని, ఈ సందర్భంగా ప్రతి సంవత్సరం నవంబర్ 9న జాతీయ న్యాయ సేవల దినోత్సవాన్ని నిర్వహించుకుంటున్నామని తెలిపారు.భారత రాజ్యాంగంలోని ఆర్టికల్ 39 ఏ ప్రకారం సమాజంలోని పేద, బలహీన, ఆర్థికంగా వెనుకబడిన వర్గాలకు సమాన న్యాయం అందించడంతో పాటు ఉచిత న్యాయ సహాయం కల్పించడం ఈ చట్టం ప్రధాన ఉద్దేశమని వివరించారు.అర్హులైన ప్రతి ఒక్కరూ ఉచిత న్యాయ సేవలను వినియోగించుకోవాలని సూచించారు.ఉచిత న్యాయ సహాయం కోసం మండల న్యాయ సేవాధికార సంస్థను సంప్రదించాలని సూచించారు.న్యాయ సేవాధికార సంస్థ ఉచిత హెల్ప్‌లైన్ నంబర్ 15100 గురించి ప్రజలకు అవగాహన కల్పించారు.ఈ కార్యక్రమంలో బార్ అసోసియేషన్ న్యాయవాదులు, న్యాయవాదుల గుమస్తాలు, కోర్టు సిబ్బంది, పారా లీగల్ వాలంటీర్లు, స్థానిక ప్రజలు, న్యాయ సేవాధికార సంస్థ సిబ్బంది తదితరులు పాల్గొన్నారు.