అన్ని పంచాయతీల్లోనూ 'మన్యం మర్యాద' అమలు చేయాలి

• ఆఫీసులు శుభ్రంగా లేకపోతే మంగళ వాయిద్యాలు మోగిస్తాం
• ​పరిశుభ్రత పాటించకపోతే చర్యలు తప్పవు: మన్యం జిల్లా కలెక్టర్
• పరిశుభ్రత, కార్యాలయాల నిర్వహణపై జిల్లా అధికారులకు కలెక్టర్ దిశానిర్దేశం

​పార్వతీపురం: అన్ని పంచాయతీల్లోనూ 'మన్యం మర్యాద' అమలు చేయాలి పార్వతీపురం మన్యం జిల్లా కలెక్టర్ డా ఎన్ ప్రభాకర రెడ్డి సోమవారం ప్రజా సమస్యల పరిష్కార వేదిక సమావేశ మందిరంలో జిల్లా అధికారులతో పార్వతీపురం మన్యం జిల్లా కలెక్టర్ ప్రత్యేకంగా సమావేశమై మాట్లాడారు. ఈ సమావేశంలో జాయింట్ కలెక్టర్ ఆర్. వైశాలి, పార్వతీపురం సబ్ కలెక్టర్ సచిన్ అర్చిత్ రహార్‌లతో కలిసి పలు కీలక విషయాలపై అధికారులకు స్పష్టమైన మార్గదర్శకాలు జారీ చేశారు. ​ఈ సందర్భంగా కలెక్టర్ మాట్లాడుతూ ప్రస్తుతం మూడు మున్సిపాలిటీల్లో ప్రారంభించిన 'మన్యం మర్యాద' కార్యక్రమాన్ని వెంటనే అన్ని పంచాయతీలలోనూ అమలు చేయాలని ఆదేశించారు. బహిరంగ ప్రదేశాల్లో చెత్త వేసే వారికి, పరిశుభ్రత పాటించని వారికి 'మంగళ వాయిద్యాలు' మోగిస్తూ, పూలు ఇచ్చి నమస్కారం చేస్తూ అవగాహన కల్పించాలని వినూత్న సూచనలు చేశారు. అలాగే అన్ని ప్రభుత్వ కార్యాలయాలు, ప్రాంగణాలు అత్యంత శుభ్రంగా ఉండాలని, ఆఫీసుల్లో డస్ట్‌బిన్లు ఏర్పాటు చేసుకుని దుమ్ము ధూళి లేకుండా చూసుకోవాలని స్పష్టం చేశారు. దీనికోసం ప్రత్యేక తనిఖీ బృందాలను రంగంలోకి దించుతున్నామని, నిబంధనలు పాటించని అధికారుల ఆఫీసుల వద్ద కూడా 'మన్యం మర్యాద' టీమ్‌లతో అవగాహన కార్యక్రమాలు నిర్వహిస్తామని హెచ్చరించారు. ప్రతీ ప్రభుత్వ కార్యాలయంలో ఉద్యోగులు, ప్రజలు ఉపయోగించే టాయిలెట్లను అత్యంత శుభ్రంగా నిర్వహించాల్సిన బాధ్యత సంబంధిత అధికారులదేనని తేల్చి చెప్పారు. గ్రీవెన్స్ సమావేశాలను వినియోగించుకుని వివిధ శాఖల మధ్య ఉన్న చిన్న చిన్న కోఆర్డినేషన్ సమస్యలను ఇక్కడే పరిష్కరించుకోవాలని పిలుపునిచ్చారు. ఈ కార్యక్రమంలో జిల్లా స్థాయి అధికారులు, పంచాయతీ, మున్సిపల్ అధికారులు తదితరులు పాల్గొన్నారు.