అక్రమంగా తరలిస్తున్న గంజాయి స్వాధీనం: ముగ్గురు నిందితుల అరెస్ట్, రెండు కార్లు స్వాధీనం

అక్రమంగా తరలిస్తున్న గంజాయి స్వాధీనం: ముగ్గురు నిందితుల అరెస్ట్, రెండు కార్లు స్వాధీనం
​కావలి మేజర్ న్యూస్ :
ఆంధ్ర-ఒడిశా సరిహద్దు ప్రాంతం నుంచి తమిళనాడుకు తరలిస్తున్న సుమారు రూ. 10 లక్షల విలువైన గంజాయిని కావలి గ్రామీణ పోలీసులు శుక్రవారం స్వాధీనం చేసుకున్నారు. ఈ కేసులో ముగ్గురు నిందితులను అరెస్ట్ చేయడంతో పాటు అక్రమ తరలింపునకు ఉపయోగించిన రెండు కార్లను సీజ్ చేశారు.
​స్థానిక పోలీస్ స్టేషన్‌లో ఏర్పాటు చేసిన విలేకరుల సమావేశంలో వివరాలను కావలి గ్రామీణ సీఐ గుడి రాజేశ్వరరావు, ఎస్ఐలు తిరుమలరెడ్డి, ఇంద్రసేనారెడ్డి వెల్లడించారు. కోల్‌కతా-చెన్నై జాతీయ రహదారి మీదుగా గంజాయి రవాణా చేస్తున్నట్లు  సమాచారంతో పోలీసులు అప్రమత్తమయ్యారు. పోలీసుల తనిఖీలను గమనించిన దుండగులు బట్లదిన్నె అడ్డరోడ్డు మీదుగా తప్పించుకునేందుకు ప్రయత్నించగా, పోలీసులు చాకచక్యంగా ఛేజ్ చేసి పట్టుకున్నారు.
​కార్లలో తనిఖీలు చేపట్టగా 46 ప్యాకెట్లలో ప్యాక్ చేసి ఉన్న 92 కిలోల గంజాయి లభ్యమైంది. అరెస్టయిన ముగ్గురు నిందితులలో ఒకరు తమిళనాడుకు చెందినవారు కాగా, మిగిలిన ఇద్దరు విశాఖపట్నం ప్రాంతానికి చెందినవారిగా గుర్తించారు. నిందితులపై కేసు నమోదు చేసి కోర్టులో హాజరుపరుస్తున్నట్లు అధికారులు తెలిపారు.