ఐసీసీసీ కేంద్రం నుంచి దసరా ఉత్సవాల పర్యవేక్షణ

ఇంద్రకీలాద్రి, మేజర్ న్యూస్: ఇంద్రకీలాద్రిపై జరుగుతున్న దసరా శరన్నవరాత్రి ఉత్సవాల నిర్వహణ, భక్తులకు కల్పిస్తున్న సౌకర్యాలు, భద్రతా ఏర్పాట్లను అధికారులు నిరంతరం పర్యవేక్షిస్తున్నారు. కొండ దిగువన ఉన్న మోడల్ ఇరిగేషన్ గెస్ట్‌హౌస్‌లో ఏర్పాటు చేసిన సమీకృత కమాండ్ కంట్రోల్ కేంద్రం (ఐసీసీసీ) నుంచి రాష్ట్ర దేవాదాయ శాఖ కార్యదర్శి కె. కన్నబాబు, కమిషనర్ రామచంద్ర మోహన్, ఎన్టీఆర్ జిల్లా కలెక్టర్ డాక్టర్ జి. లక్ష్మీశ, పోలీస్ కమిషనర్ ఎస్వీ రాజశేఖరబాబు, దేవస్థానం కార్యనిర్వహణ అధికారి వీకే శీనా నాయక్ తదితరులు ఉత్సవాల పరిస్థితిని పర్యవేక్షించారు. భక్తుల రద్దీ, భద్రత, క్యూలైన్ల నిర్వహణ, వివిధ శాఖల మధ్య సమన్వయంపై కేంద్రం నుంచి పరిస్థితిని సమీక్షిస్తూ ఉత్సవాలు సజావుగా జరిగేలా చర్యలు చేపడుతున్నారు.