ఐదు రోజులుగా రోడ్డు పక్కన శునకం మృతదేహం. అధికారుల నిర్లక్ష్యంపై స్థానికుల ఆగ్రహం.

కంబదూరు: మూగజీవాల పట్ల మానవత్వం చూపాల్సిన బాధ్యత ప్రతి ఒక్కరిపై ఉంది. అయితే కంబదూరు మండలంలో ఓ శునకం మృతి చెంది ఐదు రోజులు గడుస్తున్నా, దాని మృతదేహాన్ని తొలగించేందుకు సంబంధిత అధికారులు చర్యలు తీసుకోకపోవడం స్థానికంగా చర్చనీయాంశంగా మారింది. తిమ్మాపురం గ్రామం నుంచి కంబదూరు మండల కేంద్రానికి వెళ్లే ప్రధాన రహదారిలో పాతబడిన హాస్టల్ సమీపంలో శునకం మృతి చెంది రహదారి పక్కనే పడి ఉంది. ఐదు రోజులుగా మృతదేహాన్ని అలాగే వదిలేయడంతో కుళ్లిపోయి తీవ్ర దుర్వాసన వెదజల్లుతోంది. ఈ మార్గంలో రాకపోకలు సాగించే వాహనదారులు, పాదచారులు, సమీప ప్రాంతాల ప్రజలు దుర్వాసనతో తీవ్ర ఇబ్బందులు ఎదుర్కొంటున్నారు. శునకం అనేది మనిషికి అత్యంత విశ్వాసపాత్రమైన జంతువుగా పేరుగాంచింది. మనుషులతో సన్నిహితంగా మెలుగుతూ, ఎన్నో సందర్భాల్లో కుటుంబ సభ్యుడిలా ఆదరణ పొందుతుంది. అలాంటి మూగజీవి మృతి చెందినప్పుడు దాని మృతదేహాన్ని గౌరవప్రదంగా తొలగించడం కనీస మానవత్వంగా భావించాలి. మనిషి మరణించినా, పెంపుడు జంతువులు మృతి చెందినా వాటికి అంతిమ సంస్కారాలు నిర్వహించడం మన సంస్కృతి, సంప్రదాయాల్లో భాగం. కనీసం అనాథ శవాలకు కూడా గౌరవప్రదంగా అంత్యక్రియలు నిర్వహించే సమాజంలో మూగజీవాల మృతదేహాల పట్ల కూడా బాధ్యతతో వ్యవహరించాల్సిన అవసరం ఉంది. అయితే ఈ శునకం ఏ కారణంతో మృతి చెందిందన్నది తెలియరాలేదు. అనారోగ్యంతో ప్రాణాలు విడిచిందా, ఆహారం అందక ఆకలితో అలమటించి మృతి చెందిందా, లేక ఇతర జంతువుల దాడికి గురైందా అనే విషయాలపై స్పష్టత లేదు. కారణం ఏదైనా మృతి చెందిన మూగజీవి కళేబరాన్ని రోజుల తరబడి రహదారి పక్కనే వదిలేయడం సరైన పద్ధతి కాదని స్థానికులు అభిప్రాయపడుతున్నారు. మృతదేహం కుళ్లిపోవడంతో పరిసర ప్రాంతాల్లో అపరిశుభ్రత నెలకొనడంతోపాటు దుర్వాసన వల్ల ప్రజారోగ్యానికి ఇబ్బందులు కలిగే అవకాశం ఉందని ఆందోళన వ్యక్తం చేస్తున్నారు. ప్రజలకు పరిశుభ్రమైన పరిసరాలను కల్పించాల్సిన బాధ్యత సంబంధిత శాఖల అధికారులపై ఉంది. ముఖ్యంగా రహదారుల పక్కన మృతి చెందిన జంతువుల కళేబరాలను సకాలంలో తొలగించి, అవసరమైన పారిశుద్ధ్య చర్యలు చేపట్టాలి. కానీ ఐదు రోజులుగా శునకం మృతదేహం అక్కడే ఉన్నప్పటికీ అధికారులు స్పందించకపోవడంపై విమర్శలు వ్యక్తమవుతున్నాయి. ఇప్పటికైనా సంబంధిత పంచాయతీ, పశుసంవర్ధక శాఖ అధికారులు స్పందించి మృతదేహాన్ని గౌరవప్రదంగా తొలగించడంతోపాటు పరిసర ప్రాంతాలను శుభ్రపరిచి, క్రిమిసంహారక చర్యలు చేపట్టాలని స్థానికులు కోరుతున్నారు. మూగజీవాల పట్ల మానవత్వం చూపడంతోపాటు ప్రజారోగ్య పరిరక్షణకు అధికారులు తక్షణ చర్యలు తీసుకోవాలని విజ్ఞప్తి చేస్తున్నారు.
కళ్యాణదుర్గం టౌన్ రిపోర్టర్ :- బోయ రంగస్వామి.