అభాగ్యులకు అండగా సేవా సంస్థలు!
బాడంగి, నవంబరు 12 (మేజర్ న్యూస్):
నిరుపేదలకు అండగా నిలవడంతోపాటు విద్యార్థుల విద్యాభివృద్ధికి తోడ్పాటునందించడమే లక్ష్యంగా మూడు సేవా సంస్థలు సంయుక్తంగా పలు సేవా కార్యక్రమాలు చేపట్టాయి. అభ్యుదయ సేవా సంస్థ, సహాయ స్ఫూర్తి ఫౌండేషన్‌, అమ్మ సేవా ఫౌండేషన్‌ ఆధ్వర్యంలో గురువారం బాడంగి గ్రంథాలయం వేదికగా ఈ కార్యక్రమాలు నిర్వహించారు.
ఈ సందర్భంగా మండల కేంద్రానికి చెందిన ఓ దివ్యాంగుడికి రాకపోకలకు ఇబ్బందులు కలగకుండా వీల్‌చైర్‌ను అందజేశారు. జీవనోపాధికి ఆసరాగా నిలవాలనే ఉద్దేశంతో ఇద్దరు నిరుపేద మహిళలకు కుట్టుమిషన్‌, నిత్యావసర సరుకులు పంపిణీ చేశారు. అలాగే గ్రంథాలయానికి వచ్చి చదువుకునే విద్యార్థుల అభ్యసనానికి ఉపయోగపడేలా 70 నోటుపుస్తకాలను గ్రంథాలయాధికారికి అందజేశారు. మరో నిరుపేద పాఠశాల విద్యార్థినికి పాఠశాలకు వెళ్లేందుకు వీలుగా సైకిల్‌ను బహూకరించారు.
ఆపన్నులకు చేయూతనందించడం, విద్యార్థులను ప్రోత్సహించడం ద్వారా సమాజంలో సేవాభావాన్ని పెంపొందించవచ్చని ఈ సందర్భంగా నిర్వాహకులు పేర్కొన్నారు.
ఈ కార్యక్రమంలో అభ్యుదయ సేవా సంస్థ అధ్యక్షురాలు డాక్టర్‌ చింత శారద, సహాయ స్ఫూర్తి ఫౌండేషన్‌ అధ్యక్షుడు సాయికుమార్‌, అమ్మ సేవా ఫౌండేషన్‌ అధ్యక్షుడు సురేష్‌, గ్రంథాలయాధికారి దుర్గాప్రసాద్‌ తదితరులు పాల్గొన్నారు.
