ఆర్వోలకు సమీక్ష

నేటి దినపత్రిక సూర్య బ్యూరో రాజమహేంద్రవరంఎన్నికల ప్రక్రియలో రిటర్నింగ్ అధికారి(ఆర్వో) పాత్ర అత్యంత ప్రాధాన్యమైనదని.. రిటర్నింగ్ అధికారిగా నియమించబడిన వారు ఎన్నికల నిర్వహణలో ప్రతి అంశంపై అవగాహనతో, అప్రమత్తంగా వ్యవహరించాలని కమిషనర్ రాహుల్ మీనా సూచించారు. రిటర్నింగ్ అధికారులతో శుక్రవారం ఆయన టెలీ కాన్ఫరెన్స్ నిర్వహించారు. ఈ సందర్భంగా ఎన్నికల నిర్వహణకు సంబంధించి పలు అంశాలపై దిశానిర్దేశం చేశారు. ఎన్నికల నిర్వహణకు సంబంధించి ప్రతి బాధ్యత రిటర్నింగ్ అధికారిదేనని.. కావున ఎన్నికల ప్రక్రియలో ఎలాంటి పొరపాట్లకు తావులేకుండా, నిబంధనలు ఖచ్చితంగా పాటిస్తూ, బాధ్యతాయుతంగా విధులు నిర్వహించాలని సూచించారు. నామినేషన్ల స్వీకరణ నుండి ఫలితాల ప్రకటన వరకు తీసుకోవాల్సిన చర్యలు, నిర్వర్తించాల్సిన బాధ్యతలకు సంబంధించి చెక్ లిస్ట్ తయారు చేసుకోవాలని, మోడల్ కోడ్ ప్రతులు రాజకీయ పార్టీలకు, అభ్యర్థులకు అందించి వాటిని అమలు చేసేలా చూడాలని, ఎన్నికల ఖర్చుకు సంబంధించి పర్యవేక్షణ బాధ్యతలు నిర్వహించాలని, అభ్యర్థుల అఫిడవిట్లు, నేర చరిత్ర పరిశీలించాలని, అనర్హతకు సంబంధించిన రూల్స్ పై పట్టు ఉండాలన్నారు. అలాగే పోలింగ్ అధికారులు, సహాయ పోలింగ్ అధికారులు, ఇతర పోలింగ్ అధికారుల బాధ్యత రిటర్నింగ్ అధికారులదే అన్నారు. కనుక ఎన్నికల నిర్వహణలో ప్రతి దశను జాగ్రత్తగా పరిశీలిస్తూ, పారదర్శకంగా ఎన్నికలు జరిగేలా సమన్వయంతో పనిచేయాలని స్పష్టం చేశారు.