telangana
విద్యా హక్కు చట్టాన్ని ఉల్లంఘించే పాఠశాలలపై చర్యలేవి.?: టీఆర్‌ఎస్‌వీ జిల్లా అధ్యక్షుడు దీపక్ రెడ్డి
వికారాబాద్, మేజర్ న్యూస్: విద్యా హక్కు చట్టాన్ని ఉల్లంఘిస్తూ నిబంధనలకు విరుద్ధంగా పాఠశాలలు నిర్వహిస్తున్న యాజమాన్యాలపై చర్యలు తీసుకోవడంలో నిర్లక్ష్యం వహించిన వికారాబాద్ మండల విద్యాధికారి (ఎంఈఓ), జిల్లా విద్యాధికారి (డీఈఓ)లను వెంటనే సస్పెండ్ చేయాలని తెలంగాణ రక్షణ సేన విద్యార్థి విభాగం (టీఆర్‌ఎస్‌వీ) వికారాబాద్ జిల్లా అధ్యక్షుడు దీపక్ రెడ్డి డిమాండ్ చేశారు.సోమవారం వికారాబాద్ జిల్లా కలెక్టరేట్‌లో నిర్వహించిన ప్రజావాణి కార్యక్రమంలో అదనపు కలెక్టర్‌ను కలిసి ఈ అంశంపై వినతిపత్రం సమర్పించారు. దసరా సెలవుల్లోనూ నిబంధనలకు విరుద్ధంగా పాఠశాలలు నిర్వహిస్తూ విద్యార్థులకు ఇబ్బందులు కలిగిస్తున్న యాజమాన్యాలపై చర్యలు తీసుకోవాలని గతంలో పలుమార్లు సంబంధిత అధికారులకు ఫిర్యాదులు చేసినట్లు దీపక్ రెడ్డి తెలిపారు.అయినప్పటికీ, ఫిర్యాదులపై అధికారులు స్పందించకపోవడం పట్ల ఆయన అసంతృప్తి వ్యక్తం చేశారు. విద్యార్థుల హక్కులను పరిరక్షించాల్సిన బాధ్యత విద్యాశాఖ అధికారులపై ఉందని, నిబంధనలు ఉల్లంఘించే పాఠశాలలపై చర్యలు తీసుకోకపోవడం వెనుక కారణాలేమిటో స్పష్టం చేయాలని డిమాండ్ చేశారు. ఫిర్యాదులను పరిశీలించి, బాధ్యులపై తగిన చర్యలు తీసుకోవాలని కోరారు.ఇప్పటికైనా ఉన్నతాధికారులు స్పందించి నిబంధనలు ఉల్లంఘించిన పాఠశాలలపై, విధి నిర్వహణలో నిర్లక్ష్యం వహించినట్లు ఆరోపణలు ఎదుర్కొంటున్న అధికారులపై చర్యలు తీసుకోవాలని దీపక్ రెడ్డి కోరారు. లేనిపక్షంలో టీఆర్‌ఎస్‌వీ ఆధ్వర్యంలో జిల్లా వ్యాప్తంగా ఆందోళన కార్యక్రమాలు చేపడతామని హెచ్చరించారు.
