వారం రోజుల్లో డిప్యూటీ తహసీల్దార్ నియామకం - ప్రజావాణిలో అదనపు కలెక్టర్ హామీ

సూర్య వీణవంక వీణవంక మండల తహసీల్దార్ కార్యాలయంలో ఖాళీగా ఉన్న డిప్యూటీ తహసీల్దార్, సర్వేయర్ పోస్టులను భర్తీ చేసి, ప్రజా సమస్యలను త్వరితగతిన పరిష్కరించాలని సామాజిక కార్యకర్త, తెలంగాణ ఉద్యమకారుడు పత్తి వేణుగోపాల్ రెడ్డి కోరారు. ఈ మేరకు సోమవారం కరీంనగర్ కలెక్టరేట్‌లో నిర్వహించిన ప్రజావాణి కార్యక్రమంలో అదనపు కలెక్టర్ డాక్టర్ అశ్విని తానాజీ వాకడే, ఐఏఎస్‌కు వినతిపత్రం అందజేశారు.ఈ సందర్భంగా వేణుగోపాల్ రెడ్డి మాట్లాడుతూ.. వీణవంక మండల తహసీల్దార్ కార్యాలయంలో కీలకమైన పోస్టులు ఖాళీగా ఉండటంతో ప్రజలు రెవెన్యూ సేవలు పొందడంలో ఇబ్బందులు ఎదుర్కొంటున్నారని తెలిపారు. ముఖ్యంగా భూ సమస్యలు, భూముల సర్వే, ఇతర రెవెన్యూ సంబంధిత పనులు సకాలంలో పూర్తికాక ప్రజలు కార్యాలయాల చుట్టూ తిరగాల్సిన పరిస్థితి ఏర్పడుతోందని వివరించారు.
కార్యాలయంలో సీనియర్ అసిస్టెంట్ వైద్య సెలవులో ఉండటంతో పనుల నిర్వహణపై మరింత ప్రభావం పడుతోందని పేర్కొన్నారు. ప్రజలకు అవసరమైన రెవెన్యూ సేవలు సజావుగా అందాలంటే ఖాళీ పోస్టులను వెంటనే భర్తీ చేయడంతో పాటు, ప్రత్యామ్నాయ సిబ్బందిని ఏర్పాటు చేయాల్సిన అవసరం ఉందని వినతిపత్రంలో కోరారు.
వారం రోజుల్లో డిప్యూటీ తహసీల్దార్‌ను నియమిస్తాం: అదనపు కలెక్టర్
వినతిపత్రంపై స్పందించిన అదనపు కలెక్టర్ డాక్టర్ అశ్విని తానాజీ వాకడే.. వారం రోజుల్లో వీణవంక మండలానికి డిప్యూటీ తహసీల్దార్‌ను నియమిస్తామని హామీ ఇచ్చినట్లు పత్తి వేణుగోపాల్ రెడ్డి తెలిపారు. అలాగే సర్వేయర్ పోస్టును కూడా భర్తీ చేసి, పెండింగ్‌లో ఉన్న ప్రజా సమస్యల పరిష్కారానికి అధికారులు చర్యలు తీసుకోవాలని ఆయన కోరారు.
ప్రజలకు ఇబ్బందులు కలగకుండా రెవెన్యూ కార్యాలయంలో అవసరమైన సిబ్బందిని అందుబాటులో ఉంచి, భూ సంబంధిత సమస్యలను త్వరితగతిన పరిష్కరించాలని ఆయన విజ్ఞప్తి చేశారు.