సంగారెడ్డిలో వికసిత్ భారత్ యంగ్ లీడర్స్ డైలాగ్–2027 జిల్లా స్థాయి పోటీలకు ఏర్పాట్లు

సంగారెడ్డి, : యువతలో నాయకత్వ లక్షణాలను పెంపొందించడంతోపాటు వారి ప్రతిభను వెలికితీసేందుకు వికసిత్ భారత్ యంగ్ లీడర్స్ డైలాగ్–2027 జిల్లా స్థాయి పోటీలను నిర్వహించేందుకు జిల్లా యువజన మరియు క్రీడల శాఖ ఏర్పాట్లు చేస్తోంది. ఈ పోటీలకు సంబంధించిన ఎంపిక ప్రక్రియలో భాగంగా ఈ నెల 29వ తేదీన సంగారెడ్డి జిల్లాలోని జిల్లా కేంద్రంలో ఉదయం 9.30 గంటల నుంచి సాయంత్రం 5 గంటల వరకు పోటీలు నిర్వహించనున్నారు.కేంద్ర, రాష్ట్ర ప్రభుత్వాల ఆధ్వర్యంలో నిర్వహిస్తున్న జాతీయ యువజన ఉత్సవాల్లో భాగంగా ఈ కార్యక్రమాన్ని చేపడుతున్నారు. జిల్లా యువజన మరియు క్రీడల అధికారి ఆధ్వర్యంలో నిర్వహించే ఈ పోటీల్లో ప్రతిభ కనబరిచిన వారిని రాష్ట్ర స్థాయి పోటీలకు ఎంపిక చేయనున్నారు. రాష్ట్ర స్థాయిలో ఎంపికైన వారికి 2027 జనవరి 10 నుంచి 12వ తేదీ వరకు న్యూఢిల్లీలో జరిగే జాతీయ స్థాయి కార్యక్రమంలో పాల్గొనే అవకాశం కల్పించనున్నారు.

ఐదు విభాగాల్లో పోటీలు…
జిల్లా స్థాయిలో ఐదు విభాగాల్లో పోటీలు నిర్వహించనున్నారు. జానపద నృత్యం, జానపద గీతాల పోటీల్లో ఒక్కో విభాగానికి 10 మంది చొప్పున పాల్గొనే అవకాశం ఉంటుంది. వీటిలో ఏడు కళాకారుల బృందాలు, మూడు సహాయక బృందాలుగా పాల్గొనేలా నిబంధనలు పేర్కొన్నారు. ఒక్కో ప్రదర్శనకు 5 నుంచి 8 నిమిషాల సమయం కేటాయించారు. పాల్గొనే వారి వయస్సు 18 నుంచి 40 సంవత్సరాల మధ్య ఉండాలి.చిత్రలేఖనం పోటీలో పాల్గొనేవారికి ఆరు గంటల సమయం కేటాయించారు. రాష్ట్ర స్థాయికి అర్హత సాధించేందుకు తమ ప్రతిభను ప్రదర్శించాల్సి ఉంటుంది. నుక్కడ్ నాటక్‌ (వీధి నాటకం) విభాగంలో 10 మంది పాల్గొనే అవకాశం ఉండగా, ప్రదర్శనకు గంటన్నర సమయం కేటాయించారు. కవితా రచన విభాగంలో ఆసక్తి, ప్రతిభ కలిగిన యువత తమ రచనలను సమర్పించవచ్చు.

15 నుంచి 29 సంవత్సరాల యువతకు ప్రాధాన్యం..
గత మూడేళ్లుగా జాతీయ యువజన ఉత్సవాల్లో పాల్గొనని వారు ఈ పోటీలకు అర్హులని ప్రకటనలో పేర్కొన్నారు. ఒక పోటీలో ఒక విభాగంలో మాత్రమే పాల్గొనే అవకాశం ఉంటుంది. యువత తమ ప్రతిభను ప్రదర్శించేందుకు ఇది మంచి అవకాశమని అధికారులు తెలిపారు. యువతీ యువకులు తమ పేర్లను నమోదు చేసుకొని పోటీల్లో పాల్గొనాలని సూచించారు.

ఆన్‌లైన్‌లో రిజిస్ట్రేషన్..
ఆసక్తి గల అభ్యర్థులు ఈ నెల 27వ తేదీ లోపు జిల్లా యువజన మరియు క్రీడల అధికారి కార్యాలయంలో సంప్రదించాలని అధికారులు సూచించారు. ఆన్‌లైన్‌లో MY Bharat పోర్టల్‌ (mybharat.gov.in) ద్వారా కూడా రిజిస్ట్రేషన్ చేసుకోవచ్చు. వివరాల కోసం 7386191141, 7981798957, 8431639907 నంబర్లను సంప్రదించాలని జిల్లా యువజన మరియు క్రీడల అధికారి తెలిపారు.యువత తమలోని సృజనాత్మకత, నాయకత్వ నైపుణ్యాలను వెలికితీసుకుని జిల్లా స్థాయి నుంచి జాతీయ స్థాయి వరకు రాణించాలని అధికారులు ఆకాంక్షించారు.