శ్రీనివాస్ నగర్ అండర్‌పాస్ సైడ్ డ్రైనేజీ సమస్యను పరిష్కరిస్తాం: జాతీయ రహదారుల సంస్థ ప్రాజెక్ట్ డైరెక్టర్ భరద్వాజ్
సూర్య - మానకొండూర్: మానకొండూరు మండలం శ్రీనివాస్ నగర్ గ్రామ పరిధిలోని జాతీయ రహదారి అండర్‌పాస్ వద్ద ఎదురవుతున్న సైడ్ డ్రైనేజీ సమస్యను త్వరలోనే పరిష్కరిస్తామని జాతీయ రహదారుల సంస్థ ప్రాజెక్ట్ డైరెక్టర్ భరద్వాజ్ హామీ ఇచ్చారు.గ్రామ రైతులు ఎదుర్కొంటున్న డ్రైనేజీ సమస్యల గురించి గ్రామ సర్పంచ్ ఎరుకల శ్రీనివాస్ గౌడ్, ఉపసర్పంచ్ మేకల మహేందర్ ఆధ్వర్యంలో రైతులు ఉన్నతాధికారుల దృష్టికి తీసుకెళ్లారు. ప్రజాప్రతినిధులు, రైతుల విన్నపానికి సానుకూలంగా స్పందించిన ప్రాజెక్ట్ డైరెక్టర్ భరద్వాజ్ మంగళవారం నాడు గ్రామానికి చేరుకుని, అండర్‌పాస్ పరిసర ప్రాంతాలను క్షేత్రస్థాయిలో పరిశీలించారు.
ఈ సందర్భంగా డ్రైనేజీ లేకపోవడం వల్ల వర్షపు నీరు నిలిచిపోయి పంట పొలాలకు, రాకపోకలకు జరుగుతున్న ఇబ్బందులను సర్పంచ్, రైతులు ఆయనకు వివరించారు. సమస్య తీవ్రతను స్వయంగా పరిశీలించిన అధికారి స్పందిస్తూ.. రైతుల ఇబ్బందులను తొలగించేందుకు త్వరితగతిన సైడ్ డ్రైనేజీ నిర్మాణ పనులను చేపడతామని, సమస్యకు శాశ్వత పరిష్కారం చూపుతామని స్పష్టమైన హామీ ఇచ్చారు...
