సహాయక చర్యలలో ..'యువ ఆపద మిత్ర 'వాలంటీర్లు - కళాశాల ప్రిన్సిపల్ డాక్టర్ కే విజయ్ కుమార్

సూర్య కామారెడ్డి జిల్లా ప్రతినిధి : ప్రకృతి విపత్తుల సమయంలో అత్యవసర పరిస్థితుల్లో ప్రజల ప్రాణాలను కాపాడేందుకు ఉద్దేశించిన ‘యువ ఆపద మిత్ర’ పథకంలో భాగంగా, డిచ్‌పల్లిలోని ఏడవ బెటాలియన్‌లో నిర్వహించిన ఏడు రోజుల ప్రత్యేక శిక్షణ తరగతులను కామారెడ్డి ప్రభుత్వ ఆర్ట్స్ అండ్ సైన్స్ కళాశాల ఎన్ఎస్ఎస్ వాలంటీర్లు విజయవంతంగా పూర్తి చేసుకున్నారు.ఈ శిక్షణ కార్యక్రమంలో విపత్తులు సంభవించినప్పుడు తక్షణమే స్పందించే విధానాలు, ప్రాథమిక చికిత్స, సిపిఆర్, ఫైర్ సేఫ్టీ మరియు క్రౌడ్ మేనేజ్‌మెంట్  వంటి పలు కీలక అంశాలపై వాలంటీర్లకు సమగ్రమైన అవగాహన, శిక్షణ అందించారు. ప్రకృతి విపత్తులు ఎదురైనప్పుడు స్థానికంగా ఉండే ఈ ‘యువ ఆపద మిత్ర’ వాలంటీర్లకు వెంటనే సమాచారం అందుతుందని, వారు నిమిషాల వ్యవధిలోనే సంఘటనా స్థలానికి చేరుకుని సహాయక చర్యలు చేపడతారు.శిక్షణను విజయవంతంగా పూర్తి చేసుకున్న ఎన్ఎస్ఎస్ వాలంటీర్లకు సోమవారం కళాశాల ప్రిన్సిపల్ ప్రొఫెసర్ కె. విజయ్ కుమార్ చేతుల మీదుగా సర్టిఫికెట్లను అందుకున్నారు. ఈ సందర్భంగా ప్రిన్సిపల్ మాట్లాడుతూ..ప్రకృతి విపత్తుల సమయంలో సమయస్ఫూర్తితో వ్యవహరించి ప్రాణాలను కాపాడటం అత్యంత పవిత్రమైన విధి. ఇటువంటి శిక్షణ ద్వారా విద్యార్థుల్లో సేవాభావం, సామాజిక బాధ్యత మరింత పెరుగుతాయని యువ ఆపద మిత్రులు సమాజానికి దిక్సూచిలా నిలుస్తారు" అని అభినందించారు.ఈ కార్యక్రమంలో కళాశాల వైస్ ప్రిన్సిపల్ డాక్టర్ కె. కిష్టయ్య, అకాడమిక్ కోఆర్డినేటర్ డాక్టర్ పి. విశ్వప్రసాద్,  డాక్టర్ ఏ. సుధాకర్, డాక్టర్ జి. శ్రీనివాసరావు, ఎన్ఎస్ఎస్ కోఆర్డినేటర్లు రాజశ్రీ, డాక్టర్ రాజ్ గంభీరావు, డాక్టర్ చంద్రశేఖర్ గౌడ్ తదితరులు పాల్గొన్నారు.