పి అండ్ టీ కాలనీలోని శ్రీ సీతారామచంద్రస్వామి దేవాలయం శివనామస్మరణ
ఖైరతాబాద్ మేజర్ న్యూస్: కార్తీక మాసంలోని పవిత్ర సోమవారాన్ని పురస్కరించుకుని దిల్సుఖ్నగర్ పి అండ్ టీ కాలనీలోని శ్రీ సీతారామచంద్రస్వామి దేవాలయం శివనామస్మరణతో మార్మోగింది. ఆలయ కార్యనిర్వహణాధికారి రమాదేవి పర్యవేక్షణలో రుద్ర హోమాన్ని సంప్రదాయబద్ధంగా నిర్వహించారు. అర్చకుల వేదమంత్రోచ్ఛారణలు, హోమాగ్నికి సమర్పించిన ఆహుతులతో ఆలయ పరిసరాల్లో భక్తిభావం వెల్లివిరిసింది. భక్తులు పెద్ద సంఖ్యలో పాల్గొని పూజల్లో భాగస్వాములయ్యారు. కార్యక్రమాన్ని ఉద్దేశించి ఈవో రమాదేవి మాట్లాడుతూ ఆలయంలో ధార్మిక కార్యక్రమాలు నిరంతరం కొనసాగాలంటే భక్తుల సహకారం ఎంతో అవసరమని అన్నారు. భక్తుల ప్రోత్సాహంతోనే ఈ రుద్ర హోమాన్ని నిర్వహించగలిగామని తెలిపారు. కార్తీక మాసం ముగిసే వరకు ప్రతి సోమవారం రుద్ర హోమం నిర్వహించనున్నట్లు ప్రకటించారు. భక్తుల నుంచి మరింత సహకారం లభిస్తే ఆలయంలో అన్ని రకాల హోమాలు, ప్రత్యేక పూజలు నిత్యం నిర్వహించేందుకు చర్యలు తీసుకుంటామని, ఆలయాన్ని మరింత అభివృద్ధి చేసి ఆధ్యాత్మిక కేంద్రంగా తీర్చిదిద్దుతామని ఆమె పేర్కొన్నారు. భక్తుల భాగస్వామ్యమే ఆలయ అభివృద్ధికి ప్రధాన బలమని వివరించారు. ఈ కార్యక్రమంలో విజయదుర్గ ఆలయ ప్రధాన అర్చకులు దివాకర్ శర్మ, శివాలయ ప్రధాన అర్చకులు రాంబాబు శర్మ, రామాలయ ప్రధాన అర్చకులు దీపక్ ఆచార్యులు, వెంకటరమణ, ఆలయ సేవకులు పార్వతి, పవన్, రాఘవతో పాటు అధిక సంఖ్యలో భక్తులు పాల్గొన్నారు. హోమం విజయవంతం కావడానికి సహకరించిన భక్తులందరికీ ఈవో రమాదేవి ప్రత్యేక కృతజ్ఞతలు తెలిపారు