పరిగిలో తీవ్ర ఉద్రిక్తత: మాజీ ఎమ్మెల్యే పట్నం నరేందర్ రెడ్డి అరెస్ట్

వికారాబాద్: వికారాబాద్ జిల్లాలో రాజకీయ వాతావరణం ఒక్కసారిగా వేడెక్కింది. బిఆర్‌ఎస్ (BRS) పార్టీ సీనియర్ నాయకుడు, కొడంగల్ మాజీ ఎమ్మెల్యే పట్నం నరేందర్ రెడ్డిని పోలీసులు అరెస్ట్ చేశారు.

పరిగి బహార్‌పేట్ చౌరస్తా వద్ద పోలీసుల అడ్డుకథనం

కోస్గి మండలంలో ఇటీవల మృతి చెందిన పార్టీ కార్యకర్త అంత్యక్రియలకు హాజరయ్యేందుకు పట్నం నరేందర్ రెడ్డి వెళ్తుండగా పరిగిలోని బహార్‌పేట్ చౌరస్తా వద్ద పోలీసులు ఆయన వాహనాన్ని అడ్డుకున్నారు. ఈ క్రమంలో తన నివాసానికి, కార్యకర్త నివాసానికి వెళ్తున్న తనను ఉద్దేశపూర్వకంగా ఎందుకు అడ్డుకుంటున్నారంటూ పోలీసులతో నరేందర్ రెడ్డి తీవ్ర వాగ్వాదానికి దిగారు.

పోలీసు వాహనాన్ని చుట్టుముట్టిన కార్యకర్తలు

మాజీ ఎమ్మెల్యే అరెస్ట్ వార్త తెలుసుకున్న బిఆర్‌ఎస్ నాయకులు, కార్యకర్తలు భారీ సంఖ్యలో ఘటన స్థలానికి చేరుకున్నారు. పట్నం నరేందర్ రెడ్డిని వెంటనే విడుదల చేయాలని డిమాండ్ చేస్తూ పోలీసు వాహనాన్ని చుట్టుముట్టి నిరసన తెలిపారు. ప్రభుత్వానికి, పోలీసుల తీరుకు వ్యతిరేకంగా పెద్ద ఎత్తున నినాదాలు చేశారు.

బహార్‌పేట్ చౌరస్తాలో మోహరించిన బలగాలు

పరిస్థితి చెయ్యి దాటకుండా ఉండేందుకు ముందస్తు జాగ్రత్తగా బహార్‌పేట్ చౌరస్తా వద్ద పోలీసులు భారీగా బలగాలను మోహరించారు. నిరసనకారులను అదుపు చేసేందుకు ప్రయత్నించడంతో ఆ ప్రాంతంలో తీవ్ర ఉద్రిక్త పరిస్థితులు నెలకొన్నాయి.