చెక్కగానుగ నూనెలతో ఆరోగ్య పరిరక్షణకు బాటలు!
700కు పైగా యూనిట్ల ఏర్పాటుకు శిక్షణ.. స్వదేశీ ఉత్పత్తులకు ప్రోత్సాహం
చౌటుప్పల్, మేజర్ న్యూస్:సంప్రదాయ చెక్కగానుగ నూనెల తయారీని ప్రోత్సహిస్తూ స్వదేశీ ఉత్పత్తుల విస్తరణకు కృషి చేస్తున్న బస్వరాజు పలువురికి స్ఫూర్తిగా నిలుస్తున్నారు. ఖాదర్‌వలి శిష్యుడైన ఆయన 2016లో ఉపాధ్యాయుడిగా పనిచేస్తున్న సమయంలో ఎదురైన ఓ అనుభవం నేపథ్యంలో సహజసిద్ధమైన నూనెల తయారీపై దృష్టి సారించారు. నిత్యావసరమైన వంటనూనెల తయారీ విధానాలపై పరిశోధించి, ఎద్దుల గానుగతో తయారుచేసే సంప్రదాయ నూనెల ప్రాధాన్యాన్ని ప్రజలకు పరిచయం చేశారు. ఈ క్రమంలో పలువురికి శిక్షణ ఇచ్చి రాష్ట్రవ్యాప్తంగా 700కు పైగా చెక్కగానుగ యూనిట్ల ఏర్పాటుకు తోడ్పడ్డారు.
ఈ నేపథ్యంలో మహబూబ్‌నగర్‌ జిల్లాలోని స్వదేశీ ఉత్పత్తుల కేంద్రాన్ని ఫిజియోథెరపిస్ట్‌ డాక్టర్‌ గుండెబోయిన రమేష్‌ యాదవ్‌ సందర్శించి బస్వరాజును మర్యాదపూర్వకంగా కలిశారు. చెక్కగానుగ యూనిట్ల విస్తరణ, స్వదేశీ ఉత్పత్తుల ప్రోత్సాహానికి తనవంతు సహకారం అందిస్తానని తెలిపారు.
*సంప్రదాయ పద్ధతులే ఆరోగ్యానికి మేలు*
ఈ సందర్భంగా బస్వరాజు మాట్లాడుతూ.. సంప్రదాయ పద్ధతుల్లో తయారయ్యే నూనెలపై ప్రజల్లో అవగాహన పెంచడం, స్వదేశీ ఉత్పత్తులను ప్రోత్సహించడం తమ లక్ష్యమన్నారు. యువతకు శిక్షణ అందించి స్వయం ఉపాధి అవకాశాలు కల్పించడంతోపాటు గ్రామీణ ప్రాంతాల్లో చెక్కగానుగ యూనిట్లను మరింత విస్తరించేందుకు కృషి చేస్తున్నట్లు వివరించారు.కార్యక్రమంలో రంగారాజు లక్ష్మినర్సింహా రావు పాల్గొన్నారు.
