నాగర్‌కర్నూల్ కలెక్టరేట్‌లో ఘనంగా మహర్షి వాల్మీకి జయంతి వేడుకలు -మహర్షి వాల్మీకి ఆశయాలను ఆదర్శంగా తీసుకోవాలి – అదనపు కలెక్టర్లు బి. చెన్నయ్య, దేవసహాయం
మహర్షి వాల్మీకి జయంతిని పురస్కరించుకుని నాగర్‌కర్నూల్ కలెక్టరేట్‌లో బీసీ సంక్షేమ శాఖ ఆధ్వర్యంలో జయంతి వేడుకలను ఘనంగా నిర్వహించారు. ఈ కార్యక్రమానికి ముఖ్య అతిథులుగా అదనపు కలెక్టర్లు బి. చెన్నయ్య, దేవసహాయం హాజరయ్యారు. ఈ సందర్భంగా వారు మహర్షి వాల్మీకి చిత్రపటానికి పూలమాలలు వేసి ఘనంగా నివాళులర్పించారు.
ఈ సందర్భంగా అదనపు కలెక్టర్లు బి. చెన్నయ్య, దేవసహాయం మాట్లాడుతూ మహర్షి వాల్మీకి రచించిన రామాయణం భారతీయ సంస్కృతి, సంప్రదాయాలకు ప్రతీకగా నిలుస్తోందని పేర్కొన్నారు. రామాయణంలోని ఆదర్శాలు, ధర్మబద్ధమైన జీవన విధానం, నైతిక విలువలు నేటి సమాజానికి ఎంతో స్ఫూర్తిదాయకమని అన్నారు. మహర్షి వాల్మీకి ఆశయాలను ఆదర్శంగా తీసుకుని ప్రతి ఒక్కరూ ఉన్నతమైన విలువలతో జీవించాలని సూచించారు.
మహర్షి వాల్మీకి జీవితం, రచనలు సమాజానికి మార్గదర్శకంగా నిలుస్తున్నాయని వారు తెలిపారు. ఆయన బోధించిన సత్యం, ధర్మం, న్యాయం, మానవతా విలువలను ప్రతి ఒక్కరూ ఆచరించాలని పిలుపునిచ్చారు.
ఈ కార్యక్రమంలో డీఆర్‌ఓ పాండు, బీసీ సంక్షేమ శాఖ సహాయ అధికారి శ్రీరాములు, డిప్యూటీ సీఈవో గోపాల్ నాయక్, జిల్లా అధికారులు ఉమాపతి, కోటయ్య, సీతారాం, కుల సంఘాల నాయకులు, సిబ్బంది తదితరులు పాల్గొన్నారు.
ఎస్.రవీందర్ రెడ్డి,నాగర్ కర్నూల్, రూరల్ సూర్య న్యూస్.
