మూతపడిన ఇండోర్ స్టేడియాన్ని వెంటనే తెరిపించాలి : ఎమ్మెల్యే కేపీ వివేకానంద గౌడ్‌కు బీఆర్‌ఎస్ నాయకుల వినతి
కొంపల్లి మేజర్ న్యూస్ : కుత్బుల్లాపూర్ నియోజకవర్గంలోని ఎస్సార్ నాయక్ నగర్‌లో గత కొన్ని నెలలుగా మూతపడి ఉన్న ఇండోర్ స్టేడియాన్ని వెంటనే పునఃప్రారంభించాలని సీనియర్ బీఆర్‌ఎస్ నాయకులు గుబ్బల లక్ష్మీనారాయణ, మాజీ ప్రెసిడెంట్ ఆలూరు వెంకట శేషాచారి కోరారు. ఈ మేరకు వారు శుక్రవారం కుత్బుల్లాపూర్ ఎమ్మెల్యే కేపీ వివేకానంద గౌడ్‌ను కలిసి వినతిపత్రం అందజేశారు.
స్టేడియం మూతపడటంతో స్థానిక యువత, క్రీడాకారులు ఇబ్బందులు ఎదుర్కొంటున్నారని నాయకులు ఎమ్మెల్యే దృష్టికి తీసుకెళ్లారు. క్రీడల కోసం నిర్మించిన స్టేడియం నిరుపయోగంగా ఉండటంతో యువతకు నష్టం జరుగుతోందని, పరిసర ప్రాంతాల్లో అసాంఘిక కార్యకలాపాలు, గంజాయి వినియోగం వంటి సమస్యలు తలెత్తకుండా ముందస్తు చర్యలు తీసుకోవాలని విజ్ఞప్తి చేశారు. ఎస్సార్ నాయక్ నగర్‌తో పాటు అపురూప కాలనీ, జనప్రియ అపార్ట్‌మెంట్స్, మోడీ బిల్డర్స్, ప్లేయర్స్ కాలనీ ప్రాంతాల ప్రజలు స్టేడియం తిరిగి ప్రారంభం కావాలని ఎదురుచూస్తున్నారని తెలిపారు.
యువత క్రీడలపై ఆసక్తి పెంచుకునేందుకు, ఆరోగ్యకరమైన వాతావరణం కల్పించేందుకు స్టేడియాన్ని అందుబాటులోకి తీసుకురావాలని కోరారు. వినతిపై ఎమ్మెల్యే కేపీ వివేకానంద గౌడ్ సానుకూలంగా స్పందించి, సంబంధిత అధికారులతో మాట్లాడి స్టేడియాన్ని తిరిగి తెరిపించేందుకు కృషి చేస్తానని హామీ ఇచ్చారు. ఈ కార్యక్రమంలో ఎస్సార్ నాయక్ నగర్ మాజీ జనరల్ సెక్రటరీ వెంకట శ్యామ్, సోమేశ్వరరావు, ప్రకాష్ రావు తదితరులు పాల్గొన్నారు.
