మూడేళ్లు గడిచినా కాంగ్రెస్ 420 హామీల అమలేది..? – బీసీ కమిషన్ మాజీ సభ్యులు, బీఆర్ఎస్ రాష్ట్ర నాయకులు శుభ ప్రద్ పటేల్
వికారాబాద్ జిల్లా ప్రతినిధి, మేజర్ న్యూస్: కాంగ్రెస్ పార్టీ పార్టీ ఎన్నికల సమయంలో 420 హామీలు, ఆరు గ్యారంటీలు, 13 డిక్లరేషన్ల పేరుతో ప్రజలకు ఇచ్చిన హామీలను అధికారంలోకి వచ్చి మూడేళ్లు గడుస్తున్నా పూర్తిస్థాయిలో అమలు చేయలేదని బీసీ కమిషన్ మాజీ సభ్యులు, బీఆర్ఎస్ రాష్ట్ర నాయకులు శుభ ప్రద్ పటేల్ విమర్శించారు. కాంగ్రెస్ పార్టీ ఎన్నికల మేనిఫెస్టో విడుదల చేసి మూడు సంవత్సరాలు పూర్తయిన సందర్భంగా ఆయన కాంగ్రెస్ ప్రభుత్వంపై పలు ప్రశ్నలు సంధించారు.2023 ఎన్నికల సమయంలో ప్రజలకు ఎన్నో ఆశలు కల్పించిన కాంగ్రెస్ పార్టీ అధికారంలోకి వచ్చిన తర్వాత కీలక హామీల అమలులో వెనుకబడిందని పేర్కొన్నారు. మహిళలకు నెలకు రూ.2,500 ఆర్థిక సహాయం, రైతులకు రైతు భరోసా, పేదలకు ఇందిరమ్మ ఇళ్లు, నిరుద్యోగులకు రెండు లక్షల ఉద్యోగాలు, విద్యార్థులకు రూ.5 లక్షల విద్యా భరోసా, వృద్ధులు, వితంతువులకు రూ.4 వేల పింఛన్ వంటి హామీల అమలు పరిస్థితిపై ప్రభుత్వం స్పష్టమైన సమాధానం చెప్పాలని డిమాండ్ చేశారు.ముఖ్యంగా బీసీ డిక్లరేషన్లో ప్రకటించిన రూ.లక్ష కోట్ల నిధుల కేటాయింపు, 42 శాతం రిజర్వేషన్ల హామీ అమలు పరిస్థితి ఏమిటో వెల్లడించాలని ప్రశ్నించారు. రైతు రుణమాఫీ, నిరుద్యోగ భృతి, ఫీజు రీయింబర్స్మెంట్ బకాయిలు, ప్రభుత్వ ఉద్యోగ నియామకాల విషయంలో కూడా ప్రజలకు పూర్తి స్పష్టత ఇవ్వాలని కోరారు.వికారాబాద్ జిల్లాకు సంబంధించి పాలమూరు–రంగారెడ్డి ఎత్తిపోతల పథకం ద్వారా సాగునీటి కల్పన, పెండింగ్లో ఉన్న అభివృద్ధి పనుల పూర్తితో పాటు విద్యా, వైద్య సదుపాయాల మెరుగుదలపై కాంగ్రెస్ ప్రభుత్వం ప్రత్యేక దృష్టి సారించాలని సూచించారు.ఎన్నికల సమయంలో ఇచ్చిన హామీలు కేవలం ఓట్ల కోసం చేసిన ప్రకటనలుగా మిగిలిపోకూడదని, ప్రజలకు ఇచ్చిన మాటను నిలబెట్టుకోవాల్సిన బాధ్యత ప్రభుత్వంపై ఉందని శుభ ప్రద్ పటేల్ పేర్కొన్నారు. మూడు సంవత్సరాల పాలన పూర్తయిన సందర్భంగా 420 హామీల అమలుపై ప్రభుత్వం వెంటనే శ్వేతపత్రం విడుదల చేసి ప్రజలకు వాస్తవ పరిస్థితులను వెల్లడించాలని డిమాండ్ చేశారు.