telangana
మణికంఠ మైన్స్‌లో మృత్యుఘోష.. ఈతకు వెళ్లి ఇద్దరు విద్యార్థుల దుర్మరణం
బంట్వారం, మేజర్ న్యూస్: వికారాబాద్ జిల్లా బంట్వారం మండలం బొప్నారం గ్రామ శివారులోని మణికంఠ మైన్స్‌లో విషాదం చోటుచేసుకుంది. మైనింగ్ తవ్వకాలతో ఏర్పడిన నీటిగుంతలో ఈతకు వెళ్లిన ఇద్దరు విద్యార్థులు నీటిలో మునిగి మృత్యువాత పడ్డారు. కర్ణాటక రాష్ట్రం కుంచవరం గ్రామానికి చెందిన సురేందర్ (14), తొమ్మిదో తరగతి, అజయ్ కుమార్ (13), ఎనిమిదో తరగతి చదువుతున్నట్లు సమాచారం. చిన్న వయసులోనే ఇద్దరు విద్యార్థులు ప్రాణాలు కోల్పోవడంతో వారి కుటుంబాల్లో తీరని విషాదం నెలకొంది. ఈ ఘటనతో బొప్నారం గ్రామంలో విషాద ఛాయలు అలుముకున్నాయి.విద్యార్థుల మృతితో శోకసంద్రంలో మునిగిన కుటుంబ సభ్యులు మణికంఠ మైన్స్ వద్ద మృతదేహాలతో ఆందోళనకు దిగారు. మైన్స్ యాజమాన్యం ఘటనాస్థలానికి వచ్చి తమకు సమాధానం చెప్పిన తర్వాతే మృతదేహాలను పోస్టుమార్టం నిమిత్తం తరలించాలని డిమాండ్ చేశారు. యాజమాన్యం వచ్చే వరకు ఆందోళన విరమించేది లేదని స్పష్టం చేశారు. బాధిత కుటుంబాలకు గ్రామస్తులు మద్దతుగా నిలవడంతో ఘటనాస్థలంలో ఉద్రిక్త వాతావరణం నెలకొంది. చిన్నారుల మృతదేహాల వద్ద కుటుంబ సభ్యుల రోదనలు పలువురిని కలచివేశాయి.సమాచారం అందుకున్న సీఐ రఘు రామ్, ఎస్సై పుండ్లిక్ ఘటనాస్థలానికి చేరుకుని పరిస్థితిని పరిశీలించారు. మృతదేహాలను పోస్టుమార్టం నిమిత్తం తరలించేందుకు పోలీసులు ప్రయత్నిస్తుండగా, మైన్స్ యాజమాన్యం స్పందించిన తర్వాతే తదుపరి చర్యలు చేపట్టాలని బాధిత కుటుంబాలు పట్టుబట్టినట్లు సమాచారం. ఈ ఘటనపై ప్రజాప్రతినిధులు స్పందించి బాధిత కుటుంబాలకు అండగా నిలవాలని స్థానికులు కోరుతున్నారు.మైనింగ్ తవ్వకాలతో ఏర్పడిన లోతైన గుంతల్లో నీరు నిల్వ ఉండటం, వాటి వద్ద తగిన భద్రతా ఏర్పాట్లు లేకపోవడంపై ఆందోళనలు వ్యక్తమవుతున్నాయి. మణికంఠ మైన్స్‌లో భద్రతా నిబంధనలు పాటించారా? ప్రమాదకరమైన గుంతల చుట్టూ రక్షణ కంచెలు, హెచ్చరిక బోర్డులు ఏర్పాటు చేశారా? అనే అంశాలపై సంబంధిత అధికారులు సమగ్ర విచారణ చేపట్టాలని స్థానికులు డిమాండ్ చేస్తున్నారు. ఇద్దరు విద్యార్థుల మృతికి దారితీసిన పరిస్థితులను వెలుగులోకి తీసుకువచ్చి, నిర్లక్ష్యం ఉన్నట్లు తేలితే బాధ్యులపై కఠిన చర్యలు తీసుకోవాలని కోరుతున్నారు.
రిపోర్టర్: శ్రీనివాస్ గౌడ్, బంటారం, వికారాబాద్ జిల్లా.
Also Read: భూసారాన్ని కాపాడితేనే వ్యవసాయం లాభసాటి: ఏఓ రామకృష్ణారెడ్డి
