మాదాపూర్‌లో యూనిస్ట్రింగ్‌ టెక్‌ సొల్యూషన్స్‌ సంస్థలో అగ్నిప్రమాదం
మాదాపూర్,మేజర్ న్యూస్ : మాదాపూర్ ఖానామెట్‌ ప్రాంతంలో అగ్నిప్రమాదం చోటుచేసుకుంది. ఎన్‌ కన్వెన్షన్‌ సమీపంలోని యూనిస్ట్రింగ్‌ టెక్‌ సొల్యూషన్స్‌ సంస్థలో ఆదివారం సాయంత్రం ఒక్కసారిగా మంటలు చెలరేగాయి. తుమ్మిడికుంట వెనుక భాగంలో ఉన్న సంస్థలో మంటలు వ్యాపించడంతో ఉద్యోగులు భయాందోళనకు గురయ్యారు. సమాచారం అందుకున్న అగ్నిమాపక సిబ్బంది వెంటనే ఘటనా స్థలానికి చేరుకున్నారు. మాదాపూర్, కూకట్‌పల్లి అగ్నిమాపక కేంద్రాల నుంచి మూడు అగ్నిమాపక వాహనాలను రప్పించి మంటలను అదుపులోకి తీసుకొచ్చారు.
ప్రస్తుతం పొగ వెలువడుతుండటంతో సిబ్బంది పరిస్థితిని పర్యవేక్షిస్తున్నారు.యూనిస్ట్రింగ్‌ టెక్‌ సొల్యూషన్స్‌ సంస్థ రక్షణ రంగానికి అవసరమైన ఎలక్ట్రానిక్స్‌, రాడార్‌, ఎలక్ట్రానిక్‌ వార్‌ఫేర్‌ సాంకేతిక ఉత్పత్తులను సరఫరా చేస్తున్నట్లు సమాచారం. డ్రోన్లను గుర్తించి అడ్డుకునే వ్యవస్థల తయారీ, సరఫరాతో పాటు రక్షణ రంగానికి సంబంధించిన సాంకేతిక కార్యకలాపాలు ఇక్కడ జరుగుతున్నట్లు తెలుస్తోంది. అగ్ని ప్రమాదానికి గల కారణాలు ఇంకా తెలియరాలేదు. ప్రమాదంలో జరిగిన ఆస్తి నష్టానికి సంబంధించిన వివరాలు కూడా వెల్లడికావాల్సి ఉంది. ఘటనపై సంబంధిత అధికారులు దర్యాప్తు చేస్తున్నారు.
