మాదాపూర్ డివిజన్‌లో రూ.9.14 కోట్ల అభివృద్ధి పనులకు ఎమ్మెల్యే గాంధీ శంకుస్థాపన
పనులను నాణ్యతతో త్వరితగతిన పూర్తి చేయాలి
మాదాపూర్,మేజర్ న్యూస్ : శేరిలింగంపల్లి నియోజకవర్గం అభివృద్ధే లక్ష్యంగా మాదాపూర్ డివిజన్ పరిధిలోని పలు కాలనీల్లో రూ.9 కోట్ల 14 లక్షల 35 వేల అంచనా వ్యయంతో చేపట్టనున్న సీసీ రోడ్లు, వరద నీటి కాల్వలు, గుట్టల బేగంపేట్ స్మశాన వాటిక అభివృద్ధి, సుందరీకరణ పనులకు ఎమ్మెల్యే అరెకపూడి గాంధీ శంకుస్థాపన చేశారు.ఈ మేరకు అరుణోదయ కాలనీ, అయ్యప్ప సొసైటీ, గోకుల్ ప్లాట్స్, ఆదిత్య నగర్, మాతృశ్రీ నగర్, సిద్ధి వినాయక నగర్, గుట్టల బేగంపేట్, సర్వే ఆఫ్ ఇండియా, సైబర్ హిల్స్ ప్రాంతాల్లో ఈ పనులు చేపట్టనున్నట్లు తెలిపారు.ఈ సందర్భంగా ఎమ్మెల్యే గాంధీ మాట్లాడుతూ ముఖ్యమంత్రి రేవంత్ రెడ్డి మార్గదర్శకత్వంలో, మంత్రి శ్రీధర్ బాబు సహకారంతో శేరిలింగంపల్లిని అన్ని రంగాల్లో అభివృద్ధి చేస్తామని పేర్కొన్నారు. గుట్టల బేగంపేట్ స్మశాన వాటికను రూ.2 కోట్లతో ప్రహరీ గోడ, దహనవాటిక, స్నానపు గదులు, విశ్రాంతి గదులు, మరుగుదొడ్లు తదితర సౌకర్యాలతో ఆధునికీకరిస్తామని తెలిపారు.అభివృద్ధి పనుల్లో నాణ్యత విషయంలో రాజీ పడకుండా, నిర్ణీత సమయంలో పూర్తి చేయాలని అధికారులను ఆదేశించారు. వరద నీటి కాల్వల పనులను వేగవంతం చేసి ప్రజలకు మెరుగైన రవాణా, మౌలిక సదుపాయాలు కల్పిస్తామని హామీ ఇచ్చారు.ఈ కార్యక్రమంలో స్థానిక నాయకులు, కార్యకర్తలు, కాలనీ అసోసియేషన్ సభ్యులు, మహిళలు, కాలనీ వాసులు పెద్ద సంఖ్యలో పాల్గొన్నారు.
