కుటుంబ కలహాలతో ప్రధానోపాధ్యాయుడి ఆత్మహత్య.. మర్పల్లి మండలంలో విషాదం

మర్పల్లి, మేజర్ న్యూస్ : కుటుంబ కలహాల నేపథ్యంలో ఓ ప్రధానోపాధ్యాయుడు ఆత్మహత్యకు పాల్పడిన విషాద ఘటన మర్పల్లి మండలంలో చోటుచేసుకుంది. స్థానికులు తెలిపిన వివరాల ప్రకారం.. మండలంలోని తుమ్మలపల్లి గ్రామంలో ప్రధానోపాధ్యాయుడిగా విధులు నిర్వహిస్తున్న మంగళ వీరేశం మంగళవారం రాత్రి తన నివాసంలో ఉరివేసుకొని ఆత్మహత్య చేసుకున్నట్లు తెలిసింది. కుటుంబ కలహాలే ఆత్మహత్యకు కారణమై ఉండవచ్చని స్థానికంగా ప్రచారం జరుగుతోంది. ఆయన భార్య కూడా ఉపాధ్యాయురాలిగా సంగారెడ్డి ప్రాంతంలో విధులు నిర్వహిస్తూ తుమ్మలపల్లికి రాకపోకలు సాగిస్తున్నట్లు సమాచారం. అయితే వీరేశం ఆత్మహత్యకు గల ఖచ్చితమైన కారణాలు తెలియాల్సి ఉంది. విధి నిర్వహణలో ఉన్న ప్రధానోపాధ్యాయుడు ఆకస్మికంగా మృతి చెందడంతో ఉపాధ్యాయ వర్గాల్లో విషాదం నెలకొంది. మర్పల్లి మండల విద్యాధికారి అశోక్‌తో పాటు పలువురు ఉపాధ్యాయులు వీరేశం మృతిపట్ల తీవ్ర దిగ్భ్రాంతి వ్యక్తం చేశారు. ఆయన మృతికి సంతాపం తెలిపారు.