మల్లెపూల వాగును పరిశీలించిన మంత్రి తుమ్మల ముఖ్య అనుచరుడు పైడి వెంకటేశ్వరరావు

సూర్యదమ్మపేట,మండలంలో కురుస్తున్న భారీ వర్షాలకు రికార్డు స్థాయిలో 112.6 శాతం వర్షపాతం నమోదైంది. ఈ నేపథ్యంలో రాష్ట్ర వ్యవసాయ శాఖ మంత్రి తుమ్మల నాగేశ్వరరావు ముఖ్య అనుచరుడు, దమ్మపేట మాజీ జడ్పీటీసీ పైడి వెంకటేశ్వరరావు బుధవారం మండలంలోని దురదపాడు పొంగిపొర్లుతున్న మల్లెపూల వాగును క్షేత్రస్థాయిలో సందర్శించారు. వాగు ఉధృతిని పరిశీలించి, స్థానికులకు పలు సూచనలు చేశారు.
ఈ సందర్భంగా పైడి వెంకటేశ్వరరావు మాట్లాడుతూ.. మండల ప్రజలు అత్యవసరమైతేనే ఇండ్ల నుంచి బయటకు రావాలని, లోతట్టు ప్రాంతాల ప్రజలు నిరంతరం అప్రమత్తంగా ఉండాలని కోరారు. ఉధృతంగా ప్రవహిస్తున్న వాగులు, వంకలను దాటే సాహసం చేయవద్దని హెచ్చరించారు. వర్షాల వల్ల విద్యుత్ ప్రమాదాలు జరిగే అవకాశం ఉన్నందున కరెంట్ స్తంభాలను ముట్టుకోవద్దని, శిథిలావస్థలో ఉన్న ఇండ్లకు దూరంగా ఉండాలని విజ్ఞప్తి చేశారు. మంత్రి తుమ్మల నాగేశ్వరరావు ఆదేశాల మేరకు మండల యంత్రాంగం పూర్తి అప్రమత్తంగా ఉందని, ప్రజలకు ఎలాంటి ఇబ్బందులు తలెత్తకుండా అన్ని చర్యలు తీసుకుంటున్నామని ఆయన స్పష్టం చేశారు.

సూర్య రిపోర్టర్ దస్తగిర్ దమ్మపేట