కుడి చెరువు వద్ద బతుకమ్మ ఏర్పాట్లను పరిశీలించిన ఎమ్మెల్యే పల్లా*

చేర్యాల  మేజర్ న్యూస్ ..…చేర్యాల: తెలంగాణ సంస్కృతి, సంప్రదాయాలకు ప్రతీకగా నిలిచే సద్దుల బతుకమ్మ, విజయదశమి పండుగలను ప్రజలందరూ ఐక్యంగా, ఆనందోత్సాహాల మధ్య జరుపుకోవాలని జనగామ ఎమ్మెల్యే డాక్టర్ పల్లా రాజేశ్వర్ రెడ్డి ఆకాంక్షించారు. ఆదివారం చేర్యాల పట్టణంలోని కుడి చెరువు వద్ద బతుకమ్మ వేడుకల నిర్వహణకు చేపట్టిన ఏర్పాట్లను ఆయన పరిశీలించారు. పండుగకు వచ్చే ప్రజలకు ఎలాంటి ఇబ్బందులు కలగకుండా అవసరమైన ఏర్పాట్లు చేయాలని సంబంధిత అధికారులకు సూచించారు.ఈ సందర్భంగా ఎమ్మెల్యే మాట్లాడుతూ.. బతుకమ్మ పండుగ తెలంగాణ ఆడపడుచుల ఆత్మీయతకు, రాష్ట్ర సంస్కృతి, సంప్రదాయాలకు ప్రతీకగా నిలుస్తుందన్నారు. మహిళలు భక్తిశ్రద్ధలతో బతుకమ్మలను పేర్చి, ఆటపాటలతో పండుగను ఘనంగా జరుపుకోవడం తెలంగాణ ప్రత్యేకత అని పేర్కొన్నారు. బతుకమ్మ పండుగ ప్రజల మధ్య ప్రేమాభిమానాలను పెంపొందించి, ఐక్యతను చాటుతుందని అన్నారు.పార్టీలకు, కులమతాలకు అతీతంగా ప్రజలంతా ఒక్కటై పండుగను ఘనంగా నిర్వహించుకోవాలని పిలుపునిచ్చారు. చేర్యాల ప్రాంత ప్రజలకు, ముఖ్యంగా మహిళలకు, అక్కచెల్లెళ్లకు సద్దుల బతుకమ్మ, విజయదశమి శుభాకాంక్షలు తెలిపారు. పండుగ నిర్వహణకు ఏర్పాట్లు చేస్తున్న పాలకవర్గం, సంబంధిత అధికారులను అభినందించారు. ఈ కార్యక్రమంలో మున్సిపల్ పాలక వర్గం ,నాయకులూ ,ప్రజలు పాల్గొన్నారు .