కృష్ణానదిలో వైభవంగా దుర్గమ్మ తెప్పోత్సవం: హంస వాహనంపై భక్తులకు అభయమిచ్చిన దుర్గామల్లేశ్వరులు

విజయవాడ, సూర్య ప్రతినిధి :

విజయదశమి పర్వదినాన్ని పురస్కరించుకుని విజయవాడ కృష్ణానదిలో దుర్గమ్మ తెప్పోత్సవం అత్యంత వైభవంగా, కనులవిందుగా సాగింది. ఈ వేడుకలో భాగంగా దుర్గామల్లేశ్వరస్వామివార్లు హంస వాహనంపై ఆశీనులై కృష్ణానది జలాల్లో విహరిస్తూ భక్తులకు దివ్యదర్శనమిచ్చారు. రంగురంగుల విద్యుద్దీపాల వెలుగులతో సర్వాంగసుందరంగా అలంకరించిన హంసవాహనం కృష్ణమ్మ ఒడ్డున శోభాయమానంగా నిలిచింది. తెప్పోత్సవం నేత్రపర్వంగా పూర్తయిన అనంతరం, ఉత్సవమూర్తులను ఆలయ వీధుల్లో వైభవంగా ఊరేగించారు. ఈ మనోహర ఘట్టాన్ని తిలకించేందుకు నలుమూలల నుంచి వేలాదిమంది భక్తులు తరలివచ్చారు.