కేటీఆర్‌ తప్పుడు ప్రచారం చేస్తే ఆధారాలతో బయటపెడతా : ప్రభుత్వ విప్‌ బల్మూర్‌ వెంకట్‌
తెలంగాణ బ్యూరో ప్రతినిధి : రాజకీయంగా ఎదుర్కోలేక వ్యక్తిగత జీవితాలపై తప్పుడు ప్రచారం చేస్తున్నారని బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌పై ప్రభుత్వ విప్‌, ఎమ్మెల్సీ డాక్టర్‌ బల్మూర్‌ వెంకట్‌ ఆరోపించారు. సోషల్‌ మీడియా వేదికగా జరుగుతున్న అసత్య ప్రచారాన్ని ఆధారాలతో సహా బయటపెడతానని హెచ్చరించారు.శనివారం సీఎల్పీ కార్యాలయం లో ఆయన మీడియాతో మాట్లాడారు.
దుబాయ్‌ కేంద్రంగా కొందరు వ్యక్తులతో కలిసి సోషల్‌ మీడియాలో తప్పుడు ప్రచారం చేయిస్తున్నారని, ఇందుకోసం భారీగా డబ్బులు ఖర్చు చేస్తున్నారని వెంకట్‌ ఆరోపించారు. యూట్యూబ్‌ ఛానళ్లకు నిధులు పంపిణీ చేస్తూ వ్యక్తిగత జీవితాలపై అసత్య ప్రచారం సాగిస్తున్నారని విమర్శించారు. ఈ వ్యవహారంలో కొండూరి సాకేత్‌తో పాటు మరికొందరి పాత్ర ఉందని పేర్కొంటూ, తమ వద్ద ఆధారాలు ఉన్నాయని తెలిపారు. స్కూల్‌, కాలేజీ రోజుల్లో స్నేహితులతో దిగిన ఫొటోలను సైతం వక్రీకరించి ప్రచారం చేయడం సరికాదన్నారు. రాజకీయ విమర్శలకు వ్యక్తిగత జీవితాలను లక్ష్యంగా చేసుకోవడం ప్రజాస్వామ్యానికి విరుద్ధమని వ్యాఖ్యానించారు. ముఖ్యంగా కుటుంబాలకు చెందిన పిల్లల ఫొటోలను దుర్వినియోగం చేసే ప్రమాదం ఉందని ఆందోళన వ్యక్తం చేశారు.
తన ఆరోపణలు తప్పని భావిస్తే కేటీఆర్‌ మీడియా ముందుకు వచ్చి వాస్తవాలను వెల్లడించాలని వెంకట్‌ సవాల్‌ విసిరారు. ఆరోపణలను ఖండించడంతో పాటు అవసరమైతే చట్టపరంగా ఎదుర్కోవాలని సూచించారు. సోషల్‌ మీడియాలో అసత్య ప్రచారాన్ని ప్రశ్నిస్తూ, సంబంధిత వ్యవహారాలను ప్రజల ముందుంచుతానని స్పష్టం చేశారు.
