కట్టంగూర్‌లో అభివృద్ధి సమావేశానికి సర్పంచుల గైర్హాజరు! 22 గ్రామ పంచాయతీలకు ఆరుగురే హాజరు.. 72 శాతం మంది దూరం
నల్గొండ జిల్లా కట్టంగూరు మండల గ్రామ పంచాయతీల అభివృద్ధి, ప్రజాప్రతినిధుల సామర్థ్య వృద్ధి, ఎల్‌నినో ప్రభావాన్ని ఎదుర్కొనేందుకు తీసుకోవాల్సిన చర్యలపై కట్టంగూర్ మండల పరిషత్ కార్యాలయంలో గురువారం నిర్వహించిన సమావేశానికి సర్పంచుల హాజరు నిరాశాజనకంగా ఉంది. మండలంలోని మొత్తం 22 గ్రామ పంచాయతీలకు గాను కేవలం ఆరుగురు సర్పంచులు మాత్రమే హాజరయ్యారు. అంటే 27. శాతం మంది మాత్రమే సమావేశానికి హాజరుకాగా, మిగతా 16 మంది సర్పంచులు గైర్హాజరయ్యారు.
జిల్లా పరిషత్ ముఖ్య కార్యనిర్వహణాధికారి ఆదేశాల మేరకు ప్రతి 45 రోజులకు ఒకసారి సర్పంచులు, మండల స్థాయి అధికారులతో సమావేశం నిర్వహించాల్సి ఉంది. ఇందులో భాగంగా మండల ప్రత్యేక అధికారి జి.సతీష్ కుమార్ ఆధ్వర్యంలో, ఎంపీడీవో జి.అంజన్ రెడ్డి సమక్షంలో సమావేశం నిర్వహించారు. ముఖ్య అతిథిగా నకిరేకల్ మార్కెట్ కమిటీ చైర్మన్ గుత్త మంజుల మాధవరెడ్డి పాల్గొన్నారు.
సమావేశంలో ఎల్‌నినో ప్రభావాన్ని అధిగమించేందుకు తీసుకోవాల్సిన ముందస్తు చర్యలు, నీటి సంరక్షణపై చర్చించి నీటి ప్రతిజ్ఞ నిర్వహించారు. వివిధ శాఖల ద్వారా గ్రామ పంచాయతీల్లో చేపట్టాల్సిన అభివృద్ధి కార్యక్రమాలపై చర్చించారు.
22 గ్రామ పంచాయతీల అభివృద్ధికి సంబంధించిన కీలక సమావేశానికి ఆరుగురు సర్పంచులు మాత్రమే హాజరు కావడం చర్చనీయాంశంగా మారింది. దూరంగా ఉండటానికి కారణాలేమిటి?
గ్రామాల్లో నీటి సమస్యలు, పారిశుద్ధ్యం, అభివృద్ధి పనులు, ప్రభుత్వ పథకాల అమలుపై చర్చించాల్సిన సమావేశాలకు ప్రజాప్రతినిధుల భాగస్వామ్యం ఎంతో అవసరం. భవిష్యత్తులో నిర్వహించే సమావేశాలకు అన్ని గ్రామాల సర్పంచులు హాజరయ్యేలా అధికారులు చర్యలు తీసుకోవాలని పలువురు కోరుతున్నారు.
