కట్టంగూర్ హైవేపై చీకట్లు :పది రోజులుగా వెలగని వీధిదీపాలు.. ప్రమాదాల భయం
కట్టంగూర్: హైదరాబాద్–విజయవాడ జాతీయ రహదారిపై కట్టంగూర్ మండల పరిధిలో గత పది రోజులుగా వీధిదీపాలు వెలగడం లేదు. హైవే నిర్వహణ బాధ్యతలు చూస్తున్న జీఎంఆర్ సంస్థ పట్టించుకోకపోవడంతో రాత్రి వేళల్లో రహదారి చిమ్మచీకటిగా మారుతోంది.
నిత్యం వేలాది వాహనాలు రాకపోకలు సాగించే ఈ రహదారిపై లైట్లు వెలగకపోవడంతో వాహనదారులు తీవ్ర ఇబ్బందులు ఎదుర్కొంటున్నారు. ఎదురుగా వచ్చే వాహనాలు కనిపించకపోవడం, డివైడర్లు, మలుపులు గుర్తించలేకపోవడంతో ప్రమాదాల ముప్పు పొంచి ఉంది. ఇప్పటికే పలు చోట్ల చిన్నచిన్న ప్రమాదాలు చోటుచేసుకున్నాయని స్థానికులు చెబుతున్నారు. అయినా సంబంధిత సంస్థ స్పందించకపోవడంపై ఆగ్రహం వ్యక్తం చేస్తున్నారు.
టోల్ రూపంలో భారీగా ఆదాయం సమకూరుతున్నప్పటికీ హైవేపై కనీసం వీధిదీపాలు వెలిగించలేకపోతున్నారా? అంటూ ప్రయాణికులు ప్రశ్నిస్తున్నారు. ప్రమాదాలు జరిగిన తర్వాతే స్పందిస్తారా అని నిలదీస్తున్నారు.
మరోవైపు కట్టంగూర్ పట్టణంలోని కొన్ని ప్రాంతాల్లోనూ వీధిదీపాలు వెలగకపోవడంతో రాత్రి వేళల్లో ప్రజలు బయటకు రావడానికి భయపడుతున్నారు. చీకటి కారణంగా దొంగతనాలు జరిగే ప్రమాదం ఉందని ఆందోళన వ్యక్తం చేస్తున్నారు.
ఇప్పటికైనా జీఎంఆర్ సంస్థ స్పందించి హైవేపై పనిచేయని దీపాలకు మరమ్మతులు చేపట్టి వెలిగించాలని, సంబంధిత అధికారులు పర్యవేక్షణ పెంచాలని ప్రజలు డిమాండ్ చేస్తున్నారు. రాత్రి వేళల్లో పోలీసుల నిఘా కూడా పెంచాలని కోరుతున్నారు.