గ్రామ భద్రతకు సీసీ కెమెరాలు

శంకరపట్నం: గ్రామాల్లో నేరాల నియంత్రణ, ప్రజల భద్రతకు సీసీ కెమెరాలు దోహదపడతాయని హుజూరాబాద్‌ ఏసీపీ మాధవి అన్నారు. శంకరపట్నం మండలం కన్నాపూర్‌లో శనివారం గ్రామ సర్పంచ్‌ నూనె రమ ఆధ్వర్యంలో ఏర్పాటు చేసిన కమ్యూనిటీ సీసీ కెమెరాలను ఆమె ప్రారంభించారు. ఈ సందర్భంగా మాట్లాడుతూ దొంగతనాలు, అసాంఘిక కార్యకలాపాల నియంత్రణతో పాటు నేరస్థుల గుర్తింపునకు కెమెరాల ఫుటేజీ కీలక ఆధారంగా నిలుస్తుందన్నారు. ప్రతి గ్రామంలో ప్రజలు, ప్రజాప్రతినిధులు సమన్వయంతో సీసీ కెమెరాలు ఏర్పాటు చేసుకోవాలని సూచించారు. చొరవ చూపిన సర్పంచ్‌ను అభినందించారు. కార్యక్రమంలో హుజూరాబాద్‌ రూరల్‌ సీఐ శ్రీనివాస్‌ పాల్గొన్నారు.