గోదావరి నదిలో నీళ్లు కరువు.. మురికికుంటలో నిమజ్జనానికి నిరాకరణ

సూర్య-గోదావరిఖని:దుర్గాదేవి నవరాత్రుల ముగింపు సందర్భంగా అమ్మవారి విగ్రహాల నిమజ్జనానికి గోదావరి నదిలో నీరు లేకపోవడంతో ఇబ్బందులు ఎదురయ్యాయి. ప్రత్యామ్నాయంగా ప్రశాంతినగర్‌ సమీపంలోని కుంటలో రామగుండం నగరపాలక సంస్థ అధికారులు ఏర్పాట్లు చేయగా, ఆ నీరు మురికిగా ఉందంటూ భక్తులు అభ్యంతరం వ్యక్తం చేశారు. ఈ నేపథ్యంలో బుధవారం సాయంత్రం గోదావరిఖని మున్సిపల్‌ టీ జంక్షన్‌ వద్ద వీహెచ్‌పీ ఆధ్వర్యంలో ఆందోళన చేపట్టారు. శుద్ధమైన నీటిలో నిమజ్జనానికి ఏర్పాట్లు చేసేంతవరకు గోదావరిఖని ప్రధాన చౌరస్తాలో విగ్రహాల నిమజ్జనాన్ని నిలిపివేస్తామని నాయకులు హెచ్చరించారు. మరోవైపు, నిమజ్జనం ఆలస్యమవుతుండటంతో కార్యక్రమం ఎటువైపు దారితీస్తుందోనన్న అయోమయం నెలకొంది. విగ్రహాలను ఎక్కువసేపు నిమజ్జనం చేయకుండా ఉంచితే అశుభం జరుగుతుందేమోనని కొందరు భక్తులు సందేహాలు వ్యక్తం చేస్తున్నారు. అధికారులు వెంటనే స్పందించి పరిశుభ్రమైన నీటితో నిమజ్జన ఏర్పాట్లు చేయాలని భక్తులు కోరుతున్నారు.
--------