గోదావరి జలాలతో మత్తడి దూకుతున్న కోమటి చెరువు మాజీ మంత్రి, ఎమ్మెల్యే హరీశ్‌రావు
సిద్దిపేట అర్బన్ : రాష్ట్రంలోని పలు ప్రాంతాలు నీటి ఎద్దడిని ఎదుర్కొంటున్న తరుణంలో, సిద్దిపేటలోని కోమటి చెరువు గోదావరి జలాలతో నిండుకుండలా మారి మత్తడి దూకడం ఆనందంగా ఉందని మాజీ మంత్రి, ఎమ్మెల్యే హరీశ్‌రావు అన్నారు. కాలేశ్వరం ప్రాజెక్టు నిర్మాణంతోనే సిద్దిపేటకు స్వచ్ఛమైన గోదావరి జలాలు చేరాయని ఆయన పేర్కొన్నారు.
బతుకమ్మ పండుగ సందర్భంగా ఆదివారం హరీశ్‌రావు కుటుంబ సమేతంగా సిద్దిపేటలోని కోమటి చెరువు మినీ ట్యాంక్‌బండ్‌ ప్రాంతంలో పర్యటించారు. అక్కడ బతుకమ్మ సంబరాల్లో పాల్గొన్న మహిళలు, ప్రజలను ఆత్మీయంగా పలకరించారు. ఈ సందర్భంగా ఆయన మాట్లాడుతూ.. ఒకప్పుడు మురుగునీటితో కనిపించిన కోమటి చెరువు నేడు స్వచ్ఛమైన గోదావరి జలాలతో కళకళలాడుతోందని అన్నారు. చెరువును అన్ని విధాలుగా అభివృద్ధి చేయడంతో ప్రజలు పండుగను ఆనందోత్సాహాల మధ్య జరుపుకుంటున్నారని పేర్కొన్నారు.
తెలంగాణ సంస్కృతికి ప్రతీక బతుకమ్మ
బతుకమ్మ పండుగ తెలంగాణకు ప్రత్యేకమైన సాంస్కృతిక పండుగ అని హరీశ్‌రావు అన్నారు. తెలంగాణ బిడ్డలు తమ సంస్కృతి, సంప్రదాయాలను ప్రపంచవ్యాప్తంగా చాటిచెబుతున్నారని తెలిపారు. తెలంగాణ రాష్ట్రం ఏర్పడిన అనంతరం బతుకమ్మ పండుగను అధికారికంగా నిర్వహిస్తున్నామని పేర్కొన్నారు. పూలను పూజిస్తూ ప్రకృతిని ఆరాధించే గొప్ప సంప్రదాయం తెలంగాణ ప్రజల సొంతమని అన్నారు.
పర్యావరణ పరిరక్షణ అందరి బాధ్యత
ప్రకృతిని ప్రేమించడంతో పాటు పర్యావరణాన్ని పరిరక్షించుకోవాల్సిన బాధ్యత ప్రతి ఒక్కరిపై ఉందని హరీశ్‌రావు సూచించారు. ప్లాస్టిక్‌ వినియోగాన్ని సాధ్యమైనంత వరకు తగ్గించి, పర్యావరణహిత పద్ధతులను పాటించాలని పిలుపునిచ్చారు. పండుగల సందర్భంగా ప్రకృతి పరిరక్షణకు ప్రాధాన్యమివ్వాలని అన్నారు.సిద్దిపేటలో కోమటి చెరువు అభివృద్ధి, గోదావరి జలాల లభ్యతతో ఈ ప్రాంతం పండుగ వేడుకలకు ప్రత్యేక ఆకర్షణగా నిలుస్తోందని ఆయన పేర్కొన్నారు. బతుకమ్మ పండుగ తెలంగాణ ఆడపడుచుల ఆత్మీయతకు, పూల పండుగ వైభవానికి, తెలంగాణ అస్తిత్వానికి ప్రతీకగా నిలుస్తుందని తెలిపారు.
