ఎస్టీలను ఏ బి సి డి లుగా వర్గీకరించాలి

హిమాయత్ నగర్, మేజర్ న్యూస్ : ఎస్టీల్లోని ఉప తెగల అభివృద్ధి కోసం ఏబిసిడి లాగా వర్గీకరించాలని తెలంగాణ ఆదివాసి ఎరుకల సంఘం రాష్ట్ర అధ్యక్షుడు లోకిని రాజు డిమాండ్ చేశారు. ఆదివారం బషీర్బాగ్ ప్రెస్ క్లబ్ లో జరిగిన రాష్ట్ర ముఖ్య నాయకుల సమావేశంలో పలు తీర్మానాలను ఆమోదించి ఆయన మాట్లాడారు. ప్రత్యేక ఎస్టీ కమిషన్ ఏర్పాటు చేసి చైర్మన్ గా ఎరుకల వ్యక్తిని నియమించాలని కోరారు. ఎన్నికల హామీ మేరకు కాంగ్రెస్ ప్రభుత్వం ఏకలవ్య కార్పొరేషన్ ఏర్పాటు చేసి రూ. 500 కోట్ల బడ్జెట్ కేటాయించాలని సూచించారు. ఎస్సీ కార్పొరేషన్ ను గోండు, కోయ, లంబాడీలు మాత్రమే ఉపయోగించు కుంటున్నారని ఆవేదన చెందారు. కార్పొరేషన్ లోన్లకు బ్యాంకు తో సంబంధం లేకుండా రూ .12 లక్షల ఆర్థిక సాయం చేయాలని విజ్ఞప్తి చేశారు. ఎరుకల ఎంపవర్మెంట్ జీవోను ముఖ్యమంత్రి వెంటనే అమలు చేయాలని తెలిపారు. అన్ని రాజకీయ పార్టీలు పదవుల్లో తమకు అవకాశాలు కల్పించాలని సూచించారు. ములుగు లోని ఎరుకల నాంచారమ్మ గుడిని పునర్నిర్మించాలని మంత్రి సీతక్కకు విజ్ఞప్తి చేశారు. ఎరుకల భాష రక్షణకు అకాడమీని ఏర్పాటు చేయాలని పేర్కొన్నారు. ఈ సందర్భంగా లోకినీ గోపి రాష్ట్ర వర్కింగ్ ప్రెసిడెంట్, కిరణ్ గ్రేటర్ అధ్యక్షుడు, రాజ్ కమల్ గ్రేటర్ ప్రధాన కార్యదర్శి లుగా నియమిస్తూ పత్రాలను ఆయన అందజేశారు. ఈ సమావేశంలో ప్రధాన కార్యదర్శి కుతాటి రవికుమార్, సలహాదారులు గుడిపల్లి రవి, మహిళా అధ్యక్షురాలు సరళ కేం సాగరం, ఉపాధ్యక్షులు రాజు, రమేష్, శ్రీరామ్ ఆనంద్ ,దేవరాయ యాదగిరి, నరసింహ, రమేష్, సారయ్య తదితరులు పాల్గొన్నారు.