దివ్యాంగుల సంక్షేమానికి విశేష సేవలు.. రాష్ట్రస్థాయి అవార్డులు

మెదక్, : దివ్యాంగుల సంక్షేమం, సాధికారత కోసం విశేష కృషి చేస్తున్న వ్యక్తులు, సంస్థలకు తెలంగాణ ప్రభుత్వం రాష్ట్రస్థాయి అవార్డులు అందించనుందని జిల్లా కలెక్టర్ ప్రతిమా సింగ్ తెలిపారు.అంతర్జాతీయ దివ్యాంగుల దినోత్సవాన్ని పురస్కరించుకొని డిసెంబర్ 3, 2026న హైదరాబాద్‌లో నిర్వహించనున్న రాష్ట్రస్థాయి కార్యక్రమంలో ఈ అవార్డులను ప్రదానం చేయనున్నట్లు వెల్లడించారు.దివ్యాంగుల సంక్షేమం, అభివృద్ధి, హక్కుల పరిరక్షణ, సాధికారత, విద్య, ఉపాధి, సమాజంలో సమాన అవకాశాల కల్పన వంటి రంగాల్లో విశేష సేవలు అందించిన అర్హులైన వ్యక్తులు, స్వచ్ఛంద సంస్థలు ఈ అవార్డుల కోసం దరఖాస్తు చేసుకోవచ్చని పేర్కొన్నారు.అర్హత కలిగిన వ్యక్తులు, సంస్థలు దరఖాస్తు ఫారాలు, సంబంధిత మార్గదర్శకాలను తెలంగాణ ప్రభుత్వ అధికారిక వెబ్‌సైట్ https://depwdsc.telangana.gov.in ద్వారా పొందవచ్చని తెలిపారు.పూర్తి చేసిన దరఖాస్తులను అవసరమైన ధ్రువపత్రాలతో జతచేసి నవంబర్ 18, 2026లోగా సంబంధిత కార్యాలయంలో సమర్పించాలని సూచించారు.దివ్యాంగుల హక్కుల పరిరక్షణ, గౌరవప్రదమైన జీవనం, స్వావలంబన, సాధికారత కోసం నిరంతరం కృషి చేస్తున్న అర్హులైన వ్యక్తులు, సంస్థలు ఈ అవకాశాన్ని సద్వినియోగం చేసుకోవాలని జిల్లా కలెక్టర్ ప్రతిమా సింగ్ కోరారు.