దసరా పండుగతో స్నేహితుల ఆత్మీయ ఆలింగనం!
కొల్చారం;మెదక్ జిల్లా కొల్చారం వ్యాప్తంగా విజయదశమి పండుగ సంబరాలు ఘనంగా జరిగాయి. దసరా పర్వదినాన్ని పురస్కరించుకొని ప్రజలు కొత్త బట్టలు ధరించి, పాలపిట్టను దర్శించుకొని పండుగను ఆనందోత్సాహాల మధ్య జరుపుకున్నారు. జమ్మి ఆకులను బంగారంగా భావించి స్నేహితులు, బంధుమిత్రులకు అందజేస్తూ ఆత్మీయంగా పలకరించుకున్నారు. ఒకరినొకరు ఆలింగనం చేసుకుంటూ దసరా శుభాకాంక్షలు తెలుపుకున్నారు.పాలపిట్ట దర్శనం.. శుభసూచకం తెలంగాణ సంస్కృతి, సంప్రదాయాల్లో విజయదశమికి ప్రత్యేక స్థానం ఉంది. చెడుపై మంచి సాధించిన విజయానికి ప్రతీకగా దసరా పండుగను జరుపుకుంటారు. ఈ పర్వదినాన పాలపిట్టను దర్శించుకోవడం శుభప్రదమని ప్రజలు సంప్రదాయంగా విశ్వసిస్తారు. పాలపిట్టను విజయం, శుభారంభాలకు సంకేతంగా భావిస్తూ తరతరాలుగా ఈ ఆచారాన్ని కొనసాగిస్తున్నారు.జమ్మి ఆకులే బంగారం.. ఆత్మీయతకు చిరునామా దసరా రోజున జమ్మిచెట్టుకు పూజలు చేసి, జమ్మి ఆకులను బంగారంగా భావించి పరస్పరం ఇచ్చిపుచ్చుకోవడం ఆనవాయితీ. స్నేహితులు, బంధువులు, పెద్దలను కలిసి జమ్మి ఆకులు అందిస్తూ ఆశీర్వాదాలు తీసుకున్నారు. చిన్నా పెద్దా అనే తేడా లేకుండా అందరూ ఆత్మీయంగా పలకరించుకుంటూ ఆలింగనం చేసుకున్నారు. ఈ సంప్రదాయం స్నేహబంధాలను మరింత బలోపేతం చేయడంతోపాటు ప్రేమాభిమానాలు, ఐకమత్యానికి ప్రతీకగా నిలుస్తోంది.
