డా.సర్దార్ వల్లభాయ్ పటేల్ ఆశయాల సాధనకు ప్రతి ఒక్కరు కృషి చేయాలి. - నాగర్ కర్నూల్ జిల్లా అదనపు ఎస్పీ ఎన్. వెంకటేశ్వర్లు

 భారతదేశపు తొలి ఉప ప్రధాని, కేంద్ర హోంశాఖ మంత్రి, ఉక్కుమనిషి డాక్టర్ సర్దార్ వల్లభాయ్ పటేల్  ఆశయ సాధనకు ప్రతి ఒక్కరు కృషి చేయాలని జిల్లా అదనపు ఎస్పి నోముల వెంకటేశ్వర్లు అన్నారు. సర్దార్ వల్లభాయ్ పటేల్ 151వ జయంతి (రాష్ట్రీయ ఏకతా దివస్) వేడుకలు శనివారం నాగర్ కర్నూల్ జిల్లా పోలీస్ కార్యాలయంలో ఘనంగా నిర్వహించారు.​ఈ సందర్భంగా జిల్లా అదనపు పోలీసు ఎస్పీ సర్దార్ వల్లభాయ్ పటేల్  చిత్రపటానికి పూలమాలలు వేసి నివాళులర్పించారు. అనంతరం జిల్లా కార్యాలయ సిబ్బందితో రాష్ట్రీయ ఏక్తా దివాస్ ప్రతిజ్ఞ చేయించారు.స్వాతంత్ర్యానంతరం 500కి పైగా సంస్థానాలను భారతదేశంలో విలీనం చేసి, జాతికి ఒకే సార్వభౌమా ధికారాన్ని ప్రసాదించి అఖండ భారతాన్ని నిర్మించిన మహానాయకుడు సర్దార్ వల్లభాయ్ పటేల్ అని కొనియాడారు. ఆయన చూపిన ధైర్యం, రాజనీతిజ్ఞత, పరిపాలనా దూరదృష్టి ప్రతీ భారతీయుడికి మార్గదర్శకాలనీ, దేశ సమగ్రత, శాంతిభద్రతల పరిరక్షణ కోసం విధులు నిర్వర్తించే పోలీస్ వ్యవస్థకు పటేల్ జీవన ప్రస్థానం అత్యంత స్ఫూర్తిదాయకమన్నారు.ఆయన ఆశయాలకు అనుగుణంగా సమాజంలో ఐక్యతను, భద్రతను కాపాడేందుకు పోలీసు సిబ్బంది అంకితభావంతో పనిచేయాలన్నారు.కార్యక్రమంలో  డిఎస్పి బుర్రి శ్రీనివాస్,ఏవో కృష్ణయ్య, ఆర్ఐ జగన్, ఆర్ ఎస్సైలు ప్రశాంత్, గౌస్ పాషా,శివాజీ లతోపాటు జిల్లా పోలీస్ కార్యాలయ సిబ్బంది పాల్గొన్నారు.
పి.వినయ్ కుమార్, నాగర్ కర్నూల్ క్రైమ్ , సూర్య న్యూస్