భూసంరక్షణతోనే భవిష్యత్ వ్యవసాయానికి భరోసా:మండల ఇన్చార్జి వ్యవసాయ అధికారి ప్రభాకర్

కుల్కచర్ల, మేజర్ న్యూస్:భూసంరక్షణతోనే భవిష్యత్ వ్యవసాయానికి భరోసా కల్పిస్తుందని ఇన్చార్జి మండల వ్యవసాయ అధికారి ప్రభాకర్ తెలిపారు. సోమవారం కుల్కచర్ల మండలం కుసుమసముద్రం గ్రామ పంచాయతీ పరిధిలో ఖేతీ బచావో అవగాహన కార్యక్రమాన్ని నిర్వహించారు. ఈ సందర్భంగా భూసంరక్షణ ప్రాముఖ్యత, భూసారాన్ని కాపాడుకునే పద్ధతులు, నేల కోత నివారణ, నీటి వనరుల సంరక్షణ తదితర అంశాలపై రైతులకు అవగాహన కల్పించారు. అదేవిధంగా ఎల్‌నినో ప్రభావంతో వాతావరణంలో, వర్షపాతంలో సంభవించే మార్పులు వ్యవసాయంపై చూపే ప్రభావాలను వివరించారు. వాతావరణ పరిస్థితులకు అనుగుణంగా పంటల సాగు చేపట్టాలని, నీటిని పొదుపుగా వినియోగించుకోవాలని, భూసారాన్ని కాపాడే వ్యవసాయ పద్ధతులను పాటించాలని సూచించారు. రైతులు ప్రకృతి వనరులను సంరక్షిస్తూ, వ్యవసాయంలో తగిన జాగ్రత్తలు తీసుకోవడం ద్వారా పంటల దిగుబడిని మెరుగుపరుచుకోవచ్చని వివరించారు. ఈ కార్యక్రమంలో సర్పంచ్ ప్రవీణ్ కుమార్, నాయకులు దేవుజ్య నాయక్, లాలు, ఏఈఓ నిఖిత, హార్టికల్చర్ శాఖ అధికారి లక్ష్మయ్య, ఎఫ్ పిఓ మురళి, పంచాయతీ కార్యదర్శులు రాఘవేందర్, వెంకట్ రెడ్డి, రైతులు పాల్గొన్నారు.